Սահմանադրական փոփոխությունների ընդունումից հետո ցանկացած քաղաքական ուժ պատասխանատվություն է կրելու հասարակության առջեւ: Այս մասին այսօր՝ նոյեմբերի 30-ին, «Այո»-ի եւ «Ոչ»-ի ռեալիթի շոուի շրջանակում Կոտայքի մարզի Արզական համայնքի բնակիչների հետ հանդիպմանն ասել է «Այո» քարոզող Արման Սաղաթելյանը:
«Եվ իշխանությունը, եւ ընդդիմությունը այս նախագծով պատասխանատվություն է ձեռք բերում: Կայուն մեծամասնությունը տարին առնվազն 3 անգամ հաշվետվություն է ներկայացնելու: Ընդդիմությունն էլ, որը նախկինում մասնակցում էր ընտրության, չէր հաղթում եւ եւս հինգ տարի քարկոծում եւ հայհոյում էր, այսօր ստանում է հնարավորություն, պատասխանատվություն»,- ասել է նա:
Արման Սաղաթելյանի խոսքով՝ Սահմանադրության նոր նախագիծը կպարտադրի իշխանությանն ու ընդդիմությանը միասին աշխատել, զիջումների գնալ եւ երկրի համար անել ամեն հնարավորը:
«Այս Սահմանադրությամբ ընտրում ենք նոր ուղի եւ երթեւեկության կանոններ: Կարող ենք վթարի էլ ենթարկվել, «06»-ով ընկնել ձորը, բայց այս Սահմանադրությունն առավել է ապահովագրում մեզ հնարավոր ցնցումներից»,- նշել է:
Հիշեցնենք, որ Սահմանադրական փոփոխությունների հանրաքվեն կանցկացվի դեկտեմբերի վեցին: Այս փոփոխություններով առաջարկվում է անցում կատարել կառավարման խորհրդարանական համակարգին:
