Ֆիննական Տամպերե քաղաքում սրճարան մտնելիս Ֆինլանդիայի ֆինանսների նախարար Ալեքսանդեր Ստուբան հարձակման է ենթարկվել: Պաշտոնյան Տամպերե է ժամանել՝ համալսարանում ուսանողների համար դասախոսությամբ հանդես գալու նպատակով:
Տղամարդը նախարարի վրա անհայտ հեղուկ է լցրել՝ «ստախոս» գոչելով: Այս մասին գրում է ՏԱՍՍ-ը՝ վկայակոչելով Helsingin Sanomat պարբերականին:
Նախարարի թիկնապահները տղամարդուն դուրս են բերել շենքից: Ավելի ուշ Ստուբը տեղեկացրել է, որ հեղուկը, ամենայն հավանականությամբ, կոկա կոլա էր:
Այս միջադեպը ֆինանսների նախարարի անվան շուրջ դեռեւս նոյեմբերի 28-ին բարձրացված սկանդալի շարունակությունն է: Այդ ժամանակ Ստուբը «Յուլե» հեռուստաալիքի եթերում խոստովանել էր, որ խորհրդարանի նիստի ժամանակ անվանական բաժնետոմս ունեցողների գրանցման մասին օրինագիծը սատարող պաշտոնյաների սխալ թիվ է ներկայացրել: Նա, մասնավորապես, հաղորդել էր, որ օրենքի օգտին հանդես է գալիս պաշտոնյաների 90%-ւ՝ չնայած իրականում նրանց թիվը չի գերազանցում 10%-ը: