Հայաստանի ոստիկանապետ Վլադիմիր Գասպարյանը հրահանգել է իր ենթականերին դեկտեմբերի 6-ին՝ Սահմանադրական փոփոխությունների հանրաքվեին, պատշաճ իրականացնել իրենց պարտականությունները:
«Մի շաբաթ ա մնացել մինչեւ հանրաքվեն, ցուցակների առումով, ոստիկանության գործունեության առումով, ծառայության առումով, ոստիկանների գիտելիքների առումով, մենք անխոցելի պետք ա լինենք, եւ ամբողջ ընթացքում գործելու ենք օրենքի տառին եւ սկզբունքին համաձայն»,-այսօր՝ նոյեմբերի 30-ին, օպերատիվ խորհրդակցության ժամանակ ասել է ոստիկանապետը:
Վլադիմիր Գասպարյանը կոլեգիայի անդամներին, գլխավոր եւ մարզային վարչությունների պետերին, վարչությունների ու տարածքային բաժինների պետերին հրահանգել է իրենց ենթականերին կարգադրել ընտրատեղամասերում աջակցել լրագրողներին եւ սահմանափակ տեղաշարժման հնարավորություն ունեցող քաղաքացիներին, ինչպես նաեւ չհանդուրժել մարդկային կուտակումներ:
«Ընտրատեղամասերում կուտակումներ չտեսնեմ, տեղական իշխանության հետ իրականացնել պատշաճ ծառայություն, լրագրողներին աջակցել իրենց լրագրողական պարտականությունները կատարելու ժամանակ: Նորից նշում եմ սահմանափակ տեղաշարժման հնարավորություններ ունեցող մեր քաղաքացիներին աջակցում եք, աջակցում եք, եւ աջակցում եք»,-ասել է ոստիկանապետը:
Նշենք, որ դեկտեմբերի 6-ին տեղի կունենա Սահմանադրական փոփոխությունների հանրաքվեն: Փոփոխությունների նախագծով նախատեսվում է անցում կառավարման խորհրդարանական համակարգին:
