Դեկտեմբերի 6-ին հանրաքվեի է դրվում Սահմանադրական փոփոխությունների, ոչ թե նոր Սահմանադրության նախագիծը: Այսօր՝ դեկտեմբերի 1-ին, լրագրողների հետ հանդիպմանը նման կարծիք հայտնեց ԱԺ փոխնախագահ, ՀՀԿ մամուլի խոսնակ Էդուարդ Շարմազանովը:
«Շտապողականություն չկա, 1 տարի 8 ամիսն արդյունավետ է օգտագործվել: Պետք է չմոռանալ, որ սա ոչ թե նոր Սահմանադրություն է, այլ Սահմանադրության փոփոխություն»,- ասաց Շարմազանովը:
ԱԺ փոխնախագահը եւս մեկ անգամ ընդգծեց, որ իրենց համար այս հանրաքվեն կյանքի եւ մահվան հարց չէ: Դիտարկմանը, թե ընդդիմությունն արդեն իսկ հայտարարում է կեղծիքների մասին, Շարմազանովն ընդգծեց. «Մենք մեղավոր չենք, որ որոշ քաղաքական կուսակցություններ չունեն այնքան վստահված անձինք, որ իրենց տեղերը պահպանեն: Ճիշտ չէ, բարոյական չէ կանխավ մարդուն մեղադրել վաճառվելու մեջ: Խնդիրը պետք է քո մեջ նայես. եթե չեն կարողանում վստահված անձինք ունենալ, ո՞նց են ապագայում ժողովրդին առաջնորդելու: Դրա համար ընդդիմություն ասելը վերապահումով է»:
Նշենք, որ «Նոր Հայաստան» հանրային փրկության ճակատն ու «Չեք անցկացնի»-ն պնդում են, որ ընտրացուցակներն ուռճացված են, իշխանությունները ընտրակաշտռք են բաժանում:
«Եթե ընտրացուցակներն ուռճացված են, թող դիմեն համապատասխան մարմիններին: Ես հեռու եմ այն մտքից, որ որեւէ խախտում չի լինի: Բայց մենք անելու ենք ամեն ինչ, որ այս հանրաքվեն անցնի հնարավորինս որակյալ»,- հավելեց Շարմազանովը:
Հիշեցնենք, որ Սահմանադրական փոփոխությունների հանրաքվեն կանցկացվի դեկտեմբերի 6-ին: Փոփոխություններով նախատեսվում է անցում կատարել կառավարման խորհրդարանական համակարգին:
