Վրաստանի վարչապետ Իրակլի Ղարիբաշվիլին իր բելգիացի գործընկեր Շառլ Միշելին խնդրել է արագացնել Վրաստանի՝ ԵՄ-ի հետ ասոցացման համաձայնագրի վավերացման գործընթացը, որպեսզի ամբողջությամբ ավարտվի փաստաթղթի հաստատման գործընթացը, հաղորդում է Վրաստանի կառավարության մամուլի ծառայությունը:
Երկու երկրների վարչապետների հանդիպումը տեղի է ունեցել Փարիզում, Կլիմայի փոփոխություններին նվիրված համաշխարհային համաժողովի շրջանակներում: կողմերը քննարկելի են Վրաստանի առաջընթացը եվրոպական եւ եվրատլանտյան ինտեգրման ճանապարհին:
Բելգիան ԵՄ 28 երկրներից վերջինն է, որը դեռեւս չի վավերացրել Վրաստանի՝ ԵՄ-ի հետ ասոցացման համաձայնագիրը: Համաձայնագիրը, որը ներառում է նաեւ ազատ խորը եւ համապարփակ առեւտրի գոտի ստեղծելու համաձայնագիրը, ստորագրվել է 2014 թվականի հունիսի 27-ին, Բրյուսելում: Վրաստանի խորհրդարանը փաստաթուղթը վավերացրել է 2014-ի հուլիսի 18-ին, իսկ Եվրախորհրդարանը՝ դեկտեմբերի 18-ին: Որպեսզի համաձայնագիրն ուժի մեջ մտնի, այն պետք է վավերացնեն ԵՄ անդամ բոլոր 28 երկրները: