Հայաստանի Հանրապետությունում համախմբում կարող է լինել միայն պատերազմի դեպքում: Այսօր՝ դեկտեմբերի 1-ին, լրագրողների հետ հանդիպմանը նման կարծիք հայտնեց ԱԺ փոխնախագահ, ՀՀԿ մամուլի խոսնակ Էդուարդ Շարմազանովը՝ անդրադառնալով «Նոր Հայաստան» հանրային փրկության ճակատի հայտարարությանը, թե մինչեւ դեկտեմբերի 6-ը ժողովուրդը համախմբվելու է եւ իշխանափոխություն է անելու:
«Մոբիլիզացիա մեր երկրում կարող է լինել միայն պատերազմի ժամանակ, Աստված մի արասցե: Մենք բոլորս քույրեր եւ եղբայրներ ենք: Չի կարելի մեր երկրում թշնամիներ փնտրել: Չպետք է նույն սխալը երկրորդ անգամ կրկնենք, նկատի ունեմ նաեւ Մարտի 1-ը: Չի կարելի երկրորդ անգամ տանել բախումների, չի կարելի ատելություն սերմանել»,- ասաց Շարմազանովը՝ հորդորելով երկրում չփնտրել ներքին թշնամիներ:
ԱԺ փոխնախագահի խոսքով՝ մեր տարածաշրջանում ամենակարեւորն անվտանգությունն է. «Այսօր հազիվ 3-րդ Հանրապետություն ունենք, պիտի իրա՞ր ուտենք: Ընտրություն կլինի, թող գան հաղթեն, ես իմ աթոռը կտամ իրենց»:
Նշենք, որ «Նոր Հայաստան» հանրային փրկության ճակատի ներկայացուցիչները հայտարարել են, որ դեկտեմբերի 1-ից շուրջօրյա հանրահավաքներ են սկսելու եւ մինչեւ հանրաքվեի օրը իշխանափոխություն են անելու:
