Հայաստանի պատմության մեջ առաջին անգամ էր, որ սահմանադրական փոփոխությունների քարոզարշավին իշխանությունն ու ընդդիմությունը միասին հանդիպում ունեցան ժողովրդի հետ: Այս մասին այսօր` դեկտեմբերի 1-ին, լրագրողների հետ զրույցում ասաց ԱԺ ՀՀԿ խմբակցության պատգամավոր Սուքիաս Ավետիսյանը` անդրադառնալով «Այո»–ի եւ «Ոչ»–ի ռեալիթի շոուին։
«Մեր քարոզարշավն արդյունավետ շարունակում ենք, փորձում ենք լինել բոլոր համայնքներում, որպեսզի մարդկանց հետ անմիջական շփումներով բացատրենք բարեփոխումների նպատակը: Քարոզարշավը շատ բան տվեց, շատ մարդիկ իրազեկվեցին, հասկացան փաստաթղթի բովանդակությունը»,-ասաց Սուքիաս Ավետիսյանը:
Սահմանադրական փոփոխություններին «ոչ» ասող ԱԻՄ նախագահ Պարույր Հայրիկյանն էլ նշեց, որ սահմանադրական փոփոխությունների հանրաքվեի քարոզարշավի ամբողջ ընթացքում որեւէ խոչընդոտ չի եղել, բացառությամբ այսօրվա: Նրա խոսքով, դեկտեմբերի 1-ին Աբովյան գնացող ավտոբուսները չեն աշխատում, որը կապված է Երեւանի Ազատության հրապարակում այսօր նախատեսված հանրահավաքի հետ։ Պարույր Հայրիկյանը նշեց, որ այսօր հրավիրված համազգային հանրահավաքը ոչ թե սահմանադրական փոփոխությունների դեմ է, այլ սահմանադրկան փոփոխությունների առիթով իշխանափոխության հասնելու փորձ։
«Այսօրվա միջոցառման նպատակը սահմանադրությունը չէ, այլ իշխանությունը սահմանադրութան միջոցով փոխելը: Կազմակերպիչներն էլ շատ ազնիվ են ու պարկեշտ, ժողովրդին ասում են` եթե ապստամբություն անեք, կղեկավարենք: Ազնվորեն ասում են, որ իրենք իրենցից ոչինչ չեն ներկայացնում: Այսօր շատ մարդ է լինելու, բայց այդ մարդիկ գալիս են, որ որոշեն` ինչ-որ բան անելու են, թե ոչ, ոչ թե ապստամբություն անելու են գալու»,-ասաց Պարույր Հայրիկյանը:
Նշենք, որ «Նոր Հայաստան» հանրային փրկության ճակատը այսօր` դեկտեմբերի 1-ին, Երեւանի Ազատության հրապարակում հրավիրել է համազգային հանրահավաք եւ հայտարարել, որ պատրաստվում են շուրջօրյա հավաքների։
Հիշեցնենք, որ Սահմանադրական փոփոխությունների հանրաքվեն կանցկացվի դեկտեմբերի 6-ին: Փոփոխություններով նախատեսվում է անցում կատարել կառավարման խորհրդարանական համակարգին:
