Սահմանադրական փոփոխություններով առաջարկվող երկփուլ ընտրությունների դրույթն այսօր՝ դեկտեմբերի 1-ին, վեճի առարկա է դարձել «Այո եւ Ոչ» ռեալիթի շոուի շրջանակում:
«Ամբողջ աշխարհում խորհրդարանական ընտրություններում երկրորդ փուլ անցկացնելու հնարավորություն չկա: Ոչ մի տեղ նման բան չկա, իսկ հանարքվեի դրված նախագծում նշված է այս դրույթը: Մինչդեռ մեր խորհրդարանում կա եւ այդ կայուն մեծամասնությունը, եւ այդ 3/5-րդը»,- բորբոքված ասել է ԱԺ ՀԱԿ խմբակցության պատգամավոր, «Ոչ» քարոզող Հրանտ Բագրատյանը:
ԱԺ ՀՅԴ խմբակցության պատգամավոր Արծվիկ Մինասյանի խոսքով՝ եւ Սան Մարինոյում, եւ Իտալիայում կա երկփուլ ընտրությունների դրույթ: Հենց այս դիտարկումն էլ վեճի առիթ է դարձել: Մոտ 10-15 րոպե բանավիճելուց հետո Հրանտ Բագրատյանը համաձայնվել է, որ Իտալիայի ընտրական օրենսգրքով ամրագրված է երկրորդ փուլի անցկացումը:
Նշենք, որ երկփուլ ընտրությունների դրույթն արդեն մի քանի ամիս է՝ վիճահարույց դրույթ է դարձել քաղաքական ուժերի միջեւ: Սահմանադրական փոփոխությունների նախնական նախագծում նշված էր, որ պետք է անցկացնել երկրորդ փուլ, մինչեւ վերջնական տարբերակում գրված է, որ եթե ընտրության արդյունքով կամ քաղաքական կոալիցիա կազմելու միջոցով կայուն խորհրդարանական մեծամասնություն չի ձեւավորվում, ապա կարող է անցկացվել ընտրության երկրորդ փուլ:
Հիշեցնենք, որ Սահմանադրական փոփոխությունների հանրաքվեն կանցկացվի դեկտեմբերի 6-ին: Փոփոխություններով նախատեսվում է անցում կատարել կառավարման խորհրդարանական համակարգին:
