Ուկրաինայի նախագահ Պյոտր Պորոշենկոն ներում է շնորհել ռուսաստանցի Վլադիմիր Ստարկովին` նրան ուկրաինացի զինվորական Անդրեյ Գրեչանովի հետ փոխանակելու դիմաց: Այդ մասին տեղեկացնում է ուկրաինացի առաջնորդի պաշտոնական կայքը:
Նշվում է, որ «կիբորգ» Գրեչանովը, որի մարտական մականունը «Ռահման» է, ՈՒՌՈՒ-ի 81-րդ դեսանտա-գրոհային բրիգադի հետախուզության բաժանմունքի պետն է: Պորոշենկոն հանդիպել է Գրեչանովին եւ շնորհակալություն է հայտնել խիզախության համար:
Դոնբասում ձերբակալված ռուսաստանցի Վլադիմիր Ստարկովը դատապարտվել էր 14 տարվա ազատազրկման, ունեցվածքի առգրավմամբ: Ստարկովը ձերբակալվել է 2015 –ի հուլիսին Դոնեցկի մարզի «Բերյոզովոյե» սահմանային հսկիչ անցակետում: Ուկրաինայի պետական սահմանապահական ծառայությունը հայտնել է, որ Դոնբասում ձերբակալվել է «սպառազինությամբ լցված» բեռնատար, որում եղել է ռուսաստանցի զինվորական, մայորի կոչում ունեցող Ստարկովը, ինչպես նաեւ մի կամավորական: