Սահմանադրական փոփոխություններն արվում են նաեւ այն նպատակով, որ սոցիալական պետություն ստեղծենք: Այսօր՝ դեկտեմբերի 1-ին, «Այո»-ի եւ «Ոչ»-ի ռեալիթի շոուի շրջանակում Կոտայքի մարզի Եղվարդ համայնքում բնակիչների հետ հանդիպմանը նման կարծիք է հայտնել ԱԺ ՀՅԴ խմբակցության պատգամավոր Արծվիկ Մինասյանը՝ պատասխանելով բնակիչներից մեկի հարցին, թե դեկտեմբերի 6-ից հետո ինչ փոփոխություններ են լինելու մարդկանց կյանքում, երբ Հանրապետությունում կան հարուստներ եւ աղքատներ միայն:
«Այո, մենք ունենք բեւեռացված հասարակություն, գերհարուստներ եւ գերաղքատներ, պատճառներից մեկն էլ գործող Սահմանադրությունն է, որը կա, սակայն չի գործում: Այս փոփոխությունների միսն ու արյունն այն է, որ սոցիալական պետություն ստեղծենք, իրավունքները կյանքի կոչենք»,- ասաց Արծվիկ Մինասյանը:
Նշենք, որ Եղվարդում թեժ մթնոլորտ է. «Այո» եւ «Ոչ» քարոզողներն անընդհատ բանավիճում են միմյանց հետ տարբեր հարցերի շուրջ:
Հիշեցնենք, որ Սահմանադրական փոփոխությունների հանրաքվեն կանցկացվի դեկտեմբերի 6-ին: Փոփոխություններով նախատեսվում է անցում կատարել կառավարման խորհրդարանական համակարգին:
