Սահմանադրական փոփոխություններով ՀՀԿ-ն հավերժ իշխանություն է ձեռք բերում: Այսօր՝ դեկտեմբերի 1-ին, «Այո»-ի եւ «Ոչ»-ի ռեալիթի շոուի շրջանակում Կոտայքի մարզի Եղվարդ համայնքի բնակիչների հետ հանդիպմանը նման կարծիք է հայտնել ԱԺ ՀԱԿ խմբակցության պատգամավոր, նախկին վարչապետ Հրանտ Բագրատյանը՝ հորդորելով եղվարդցիներին դեկտեմբերի վեցին դեմ քվեարկել Սահմանադրական փոփոխություններին:
«Սահմանադրական փոփոխություններով վերացվում է մաքուր ընտրություն անցկացնելու հնարավորությունը: Սա փոփոխություն է դեպի հետ, ոչ թե առաջ: Սա փոփոխություն է դեպի անփոփոխություն: Իշխանությունները սրա միջոցով հավերժություն են ստանում»,- ասել է Հրանտ Բագրատյանը:
Ընդդիմադիր պատգամավորի խոսքով՝ Սահմանադրական փոփոխությունները ճանապարհ են դեպի միջնադար:
Հիշեցնենք, որ Սահմանադրական փոփոխությունների հանրաքվեն կանցկացվի դեկտեմբերի 6-ին: Փոփոխություններով նախատեսվում է անցում կատարել կառավարման խորհրդարանական համակարգին: