Վազգեն Սարգսյանի անվան ռազմական ինստիտուտում 2015թ. հունվարին դաժանաբար սպանված կուրսանտ Հայկազ Բարսեղյանի գործով երկրորդ դատական նիստը այսօր՝ նոյեմբերի 18-ին, չկայացավ՝ ամբաստանյալներից մեկի բացակայության պատճառով:
NEWS.am-ի թղթակիցը հաղորդում է, որ այս դատական նիստին ներկա չէր Վարազդատ Սաֆարյանը, որը ժամկետային ծառայության մեջ է: Դատավորն ասաց, որ ծանուցագիր է ուղարկվել այն զորամաս, որտեղ նա ծառայում է, հրամանատարը ստացել է, սակայն չներկայանալու մասին դատարանին չեն զգուշացրել:
Այս դատական նիստին ներկա չէին սպանված Հայկազ Բարսեղյանի ծնողները: Տուժող կողմի փաստաբան Գարիկ Գալիկյանը նշեց, որ նրանք իր հորդորով չեն եկել դատարան:
«Հոգեպես վատ վիճակում էին, ես եմ խորհուրդ տվել, որ ներկա չլինեն»,- ասաց նա:
Հաջորդ դատական նիստը տեղի կունենա դեկտեմբերի 10-ին:
Նիստը նախագահում է դատավոր Դավիթ Հարությունյանը:
Ըստ մեղադրական եզրակացության՝ ռազմական ինստիտուտի կուրսանտներ Գնել Թևոսյանը, Նորիկ Սահակյանը,Վաչե Սահակյանը և Մովսես Ազարյանը հունվարի 29-ին ժամը 02:00-ից 03:00-ի սահմանում զորամասի առաջին գումարտակի առաջին մարտկոցի թիվ 408 ննջարանում առանձին դաժանությամբ, խուլիգանական դրդումներով սպանել են կուրսանտ Հայկազ Բարսեղյանին:
4 կուսանտների դատաքննության հետ քննվում է նաեւ կուրսանտ Վարազդատ Սաֆարյանի գործը: Ըստ մեղադրանքի՝ նա 2014թ. նոյեմբերի 16-ին ժամը 21.00-ի սահմանում նույն մարտկոցի կուրսանտ Տ. Մանասերյանին շարքում խոսելու համար դիտողություն անելուց ու նրա կողմից հակադարձում ստանալուց հետո Վաչե Սահակյանի, Մովսես Ազարյանի հետ ծեծի է ենթարկել Մանասերյանին: Բացի այդ՝ 2015թ. հունվարին լսարանում խոսելու համար ծեծի է ենթարկել համածառայող Արտուշ Սիմոնյանին:
