Սահմանադրական փոփոխությունները որեւէ վտանգ չեն ներկայացնում երկրի անվտանգությանը եւ սահմաններին: Այս մասին այսօր՝ դեկտեմբերի 1-ին, «Այո» եւ «Ոչ» ռեալիթի շոուի շրջանակում Գեղարքունիքի մարզի Գանձակ համայնքի բնակիչների հետ հանդիպմանը վստահեցրել է ԱԺ ՀՀԿ խմբակցության պատգամավոր Մարգարիտ Եսայանը:
«Երբ Սահմանադրական փոփոխություններ նախաձեռնվեցին, միակ պայմանը, որը Հանրապետության նախագահ Սերժ Սարգսյանը դրեց աշխատանքային խմբի առջեւ, այն էր, որ որեւէ հոդված չփոփոխվի այնպես, որը կնվասի ՀՀ անվտանգությանը, մեր ժողովրդին, սահմաններին: Միակ պահանջն է սա եղել նախագահը, իսկ Սահմանադրական բարեփոխումների մասնագիտական հանձնաժողովի անդամները այդ պահանջը պահպանել են ամենայն լրջությամբ»,- ասել է ՀՀԿ-ական պատգամավորը:
Մարգարիտ Եսայանի խոսքով՝ Հայաստանում այսօր առկա են սոցիալական, տնտեսական խնդիրներ, սակայն անվտանգության առումով մենք ամենաապահով երկրների տասնյակում են:
Նշենք, որ «Հյուսիս» ուղղության «Այո»-ի մասնակիցներն են՝ ԱԺ «Հանրապետական» խմբակցության պատգամավորներ Մարգարիտ Եսայանը, Սամվել Ֆարմանյանը, ԱԺ ԲՀԿ խմբակցության պատգամավոր Միքայել Մելքումյանը, ՀՅԴ անդամ Արթուր Եղիազարյանը: Իսկ «Ոչ»-ի ճակատից են «Հայազն» կուսակցության ներկայացուցիչ Արմեն Մկրտչյանը, «Ազատ Դեմոկրատներ» կուսակցության ներկայացուցիչ Նարեկ Այվազյանը, Վարդան Խաչատրյանը:
Հիշեցնենք, որ Սահմանադրական փոփոխությունների հանրաքվեն տեղի կունենա դեկտեմբերի 6-ին: Այս փոփոխություններով նախատեսված է անցում կատարել կառավարման խորհրդարանական համակարգի: