Ըստ պաշտոնական վիճակագրության՝ հունվար- հոկտեմբեր ժամանակահատվածում գրանցված իրավախախտների թիվը տարեկան կտրվածքով 6.1 տոկոսով կրճատվել է: Բայց մեղրի տակառը, ինչպես ասում են առանց ձյութի չի լինում: Այս ոլորտում ընդհանուր բարեկեցության ֆոնին 6 տոկոսով աճել են «սեփականանության դեմ հանցագործությունները», այդ թվում «անձնական ունեցվածքի գողությունը»՝ 6.6 տոկոսով: Նկատենք, որ վերջիններիս մասննաբաժինը գրանցված իրավախախտումների ընդհանուր քանակության մեջ 4.5 տոկոսով աճել է՝ հասնելով 37.8 տոկոսի:
Ընդ որում կտրուկ՝ 8.2 տոկոսով, ավելացել է սովորական գողությունների քանակը: Վերջինիս մասնաբաժինը գրանցված իրավախախտումների ընդհանուր քանակությունում մոտեցել է ընդհուպ 30 տոկոսի:
Զարմանալի է, որ նման այլանդակություն տեղի է ունենում տնտեսությունում դրական տեղաշարժերի ֆոնին: Փոխանակ ուրախանալ այդ հաջողությամբ, առանձին անգիտակից քաղաքացիներ աչք են տնկել ուրիշի ունեցվածքի վրա: Իսկ հաջողությունները, դատելով պաշտոնական թվերից, փոքր չեն:
Այսպես, օրինակ հունվար- հոկտեմբեր ամիսներին արդյունաբերական արտադրանքի ֆիզիկական ծավալը աճել է 4.6 տոկոսով, գյուղատնտեսականինը՝ 11.6 տոկոսով: Նույնիսկ շինարարությունը, որը անշեղերոն կրճատվում էր վերջին տարիներին, դրական տեղաշարժ է արձանագրել: Ճիշտ է զուտ խորհրդանշական (0.1 տոկոսի աճ) բայց այնուամենայնիվ դրական:
Ի դեպ, շինարարության մասին: Հինգ տարի առաջ այդ ոլորտում, ըստ պաշտոնական տվյալների, 85.8 հազար մարդ էր աշխատում: Անցած տարի աշխատողների թիվը նվազել է մինչեւ 58.6 հազար: Իսկ թե ուր են անհետացել ավելի քան 27 հազար շինարարները՝ պարզ չէ: Գուցե մնացել են հայրենիքում՝ համալրելով գործազուրկների շարքերը, գուցե Ռուսաստան են մեկնել՝ աշխատելու: Չնայած այնտեղ նույնպես ծանր ժամանակներ են հասունացել...
Ռուսաստանի տնտեսության ճգնաժամը չի շրջանցել նաեւ այն ոլորտները, որոնցում ներգրավված է մեր արտագնա աշխատողների մեծ մասը: Եվ այսպես՝ հունվար – հոկտեմբեր ամիսներին շինարարության ֆիզիկական ծավալը տարեկան կտրվածքով կրճատվել է 10.3 տոկոսով, իսկ մեծածախ առեւտրի շրջանառությունը՝ 8.8 տոկոսով: Հոկտեմբերին գործազուրկների թիվը Ռուսաստանում աճել է 8.1 տոկոսով, այդ թվում պաշտոնական գրանցվածներինը՝ 13. 7 տոկոսով: Հասկանալի է, որ այս պայմաններում առաջին հարվածը սոցիալապես անպաշտպան աշխատողներին է բաժին հասնում՝ այսինքն աշխատանքային միգրանտներին:
Արտաքին դրամական փոխանցումները, Հայաստանում հարյուր հազարավոր մարդկանց ընտանեկան բյուջեի կարեւորագույն եկամտի աղբուրներից մեկը, հունվար – սեպտեմբեր ամիսներին գրեթե մեկ երրորդով կրճատվել է: Օրինաչափ հետեւանք է դարձել մեծածախ ապրանքաշրջանառության ծավալի անկումը: Ընդ որում ոչ միայն համադրվող գներով (8.3 տոկոս հունվար – հոկտեմբեր ամիսներին), այլ նույնիսկ ընթացիկ գներով ( գրեթե 4.8 տոկոս):
Սմբատ Գրիգորյան
