Ադրբեջանում ոստիկանության աշխատակիցները Գյանջայում այսպես կոչված կրոնական արմատականների դեմ հատուկ գործողություն են իրականացրել, հայտնում է Minval.az-ը ` վկայակոչելով Ադրբեջանի ՆԳՆ մամուլի ծառայության հաղորդագրությունը:
Ըստ հաղորդած տեղեկությունների՝ գործողության ընթացքում ձերբակալվել է քաղաքի բնակիչ Մուբարիզ Իբրահիմովը, որը աջակցում էր «Մահմեդականների միություն» խմբավորման անդամներին:
Ձերբակալվածի մեքենայում խուզարկության ընթացքում հայտնաբերել ու առգրավել են «ՌԳԴ-5 » տեսակի 4 ինքնաշեն նռնակ, նաեւ արգելված գրականություն՝ երկու օրինակով, ու մեկ զրահահագուստ:
Նոյեմբերի 30-ին Գյանջայի ոստիկանության գլխավոր վարչության աշխատակիցները ձերբակալել են «Մահմեդականների միություն» շարժման անդամներին աջակցող Ռամիզ Սարիեւին: Ենի Գյանջա ավանում գտնվող նրա բնակարանի խուզարկության ընթացքում հայտնաբերվել ու առգրավել են «Էֆ 1» տեսակի 3 նռնակ, 2 պահունակներ, 67 հատ տարբեր տրամաչափի փամփուշտ, 1 պլանշետ, 9 DVD սկավառակ, 22 օրինակ կրոնական գրականություն եւ «Մահմեդականների միության» առաջնորդ հաջի Թալեխ Բագիրզադեի ուղերձի 2 օրինակ:
Նոյեմբերի 30-ին Գյանջայի ոստիկանության շրջանային վարչության աշխատակիցների կողմից ձերբակալվել է նաեւ «Մահմեդականների միության» անդամներին աջակցող Ռովշան Ասադովը: Նրա բնակարանում արված խուզարկության ժամանակ հայտնաբերվել են 1 «ԱԿ 74» ավտոմատ, 2 պահունակ, 30 փամփուշտ, 11 DVD սկավառակ, 12 օրինակ կրոնական գրականություն, 5 բանկային քարտ՝ պարսկերեն գրությամբ, 1 բջջային հեռախոս՝ պարսկերեն տառատեսակով ու քարտեզով, նաեւ «Մահմեդականների միության» առաջնորդ հաջի Թալեխ Բագիրզադեի ուղերձի չորս օրինակ:
