Մոսկվայի եւ Անկարայի միջեւ կապի վերոհիշյալ ուղիները գոյություն ունեին նաեւ անցյալում, սակայն դրանք հնարավորություն չտվեցին խուսափել ռուսական Սու-24-ին պատահած ողբերգությունից: Այդ մասին ասել է Ռուսաստանի նախագահի մամուլի քարտուղար Դմիտրի Պեսկովը` պատասխանելով թուրքական իշխանությունների` երկու երկրի միջեւ ռազմական ուղի ստեղծելու առաջարկին, տեղեկացնում է Lenta-ն:
«Այդ ուղիները արդյունք չեն տվել, ընդ որում` դիտավորյալ, թե ոչ, բայց ոչ ռուսական կողմի մեղքով», — ասել է Պեսկովը:
Կրեմլի ներկայացուցիչը նաեւ ենթադրել է, որ թուրքական կողմը չէր էլ պատրաստվում գործարկել Մոսկվայի հետ հաղորդակցության այդ հնարավորությունները: Միաժամանակ նա հրաժարվել է մեկնաբանել դրանց վերականգնման հնարավորությունը:
Դեկտեմբերին ռազմական ուղու ստեղծման կոչ էր արել Թուրքիայի վարչապետ Ահմեդ Դավութօղլուն: Նրա կարծիքով, դա անհրաժեշտ է այնպիսի միջադեպերի կանխման համար, որպիսին Սիրիայի երկնքում ռուսական Սու-24 ռմբակոծիչին պատահածն էր:
