Վազգեն Սարգսյանի անվան ռազմական ինստիտուտում 2015թ. հունվարին դաժանաբար սպանված կուրսանտ Հայկազ Բարսեղյանի տատը` Անահիտ Առուստամյանը, մեկ շաբաթ առաջ նախագահ Սերժ Սարգսյանին նամակ է ուղարկել` կուրսանտի սպանության գործով դատական նիստերը այլեւս չհետաձգելու խնդրանքով: Այս մասին այսօր` դեկտեմբերի 1-ին, NEWS.am-ի հետ զրույցում ասաց Հայկազ Բարսեղյանի հայրը` Արկադի Բարսեղյանը: Նրա խոսքով, իր որդու սպանության գործով դատական նիստի առաջին օրը դատարանում մի քանի երիտասարդներ են եղել, որոնք իր կնոջն ու մորը հայհոյել եւ սպառնացել են` ասելով, որ «նրանց հարցերը կլուծեն»:
«Մայրս իր նամակով նախագահին խնդրել է նաեւ ապահովել իր եւ հարազատների անվտանգությունը, քանի որ, բացահայտ այդ երիտասարդները սպառնացել էին մեզ` տուժող կողմին: Բացի այդ, մենք չենք ուզում, որ փաստաբաններն անընդհատ ինչ-որ պատճառներ փնտրեն եւ հետաձգեն դատական նիստերը»,-ասաց Արկադի Բարսեղյանը:
Հիշեցնենք, որ Վազգեն Սարգսյանի անվան ռազմական ինստիտուտում 2015թ. հունվարին դաժանաբար սպանված կուրսանտ Հայկազ Բարսեղյանի գործող երկրորդ դատական նիստը տեղի ունեցավ այսօր` դեկտեմբերի 1-ին, Երեւանի Ավան եւ Նոր Նորք վարչական շրջանների ընդհանուր իրավասության դատարանում, իսկ առաջին դատական նիստը տեղի էր ունեցել 2015թ. նոյեմբերի 18-ին, որն անցել էր լարված մթնոլորտում:
Ըստ մեղադրական եզրակացության՝ ռազմական ինստիտուտի կուրսանտներ Գնել Թևոսյանը, Նորիկ Սահակյանը,Վաչե Սահակյանը և Մովսես Ազարյանը հունվարի 29-ին ժամը 02:00-ից 03:00-ի սահմանում զորամասի առաջին գումարտակի առաջին մարտկոցի թիվ 408 ննջարանում առանձին դաժանությամբ, խուլիգանական դրդումներով սպանել են կուրսանտ Հայկազ Բարսեղյանին:
4 կուրսանտների դատաքննության հետ քննվում է նաեւ կուրսանտ Վարազդատ Սաֆարյանի գործը: Ըստ մեղադրանքի՝ նա 2014թ. նոյեմբերի 16-ին ժամը 21.00-ի սահմանում նույն մարտկոցի կուրսանտ Տ. Մանասերյանին շարքում խոսելու համար դիտողություն անելուց ու նրա կողմից հակադարձում ստանալուց հետո Վաչե Սահակյանի, Մովսես Ազարյանի հետ ծեծի է ենթարկել Մանասերյանին: Բացի այդ՝ 2015թ. հունվարին լսարանում խոսելու համար ծեծի է ենթարկել համածառայող Արտուշ Սիմոնյանին:
Հիշեցնենք, որ 2015թ. հունվարի 29-ին՝ ժամը 06:35-ի սահմանում Երեւանում տեղակայված ուսումնական զորամասերից մեկի մարզահրապարակում հայտնաբերվել էր նույն զորամասի 1-ին կուրսի ուսանող Հայկազ Արկադիի Բարսեղյանի դին՝ պտտաձողի վրա պարանով կախված վիճակում:
