Գլխի գագաթային շրջանի հրազենային վնասվածքի հետեւանքով նոյեմբերի 28–ին մահացած 18-ամյա Գեւորգ Խաչատրյանի հարազատները չեն հավատում ժամկետային զինծառայողի մահվան նախնական պաշտոնական վարկածին, ըստ որի, նա ինքնասպան է եղել: NEWS.am-ի հետ զրույցում զոհված զինծառայողի հորեղբայրը` Հարություն Խաչատրյանը, նշեց, որ դեպքից 20 րոպե առաջ է խոսել Գեւորգի հետ եւ ոչ մի տարիօրինակ բան չի նկատել նրա մոտ: Դեպքից 20 րոպե առաջ Գեւորգը հորեղբորն ասել է, որ լավ տրամադրություն ունի եւ պատրաստվում է դիրքեր բարձրանալ:
«Նորմալ, կյանքով լի տղա էր, խի՞ պիտի ինքնասպան լիներ, որ մի նորմալ մարդը էդ քայլին կգնա: Դեպքից 20 րոպե առաջ եմ հետը խոսել, ասաց` պոստ եմ գնում, հոպար ջան, ասացի` զգույշ կլինես, տաք հագնվե՞լ ես, ասաց հա: Հետո ասաց, հոպար ջան, մամաս ա զանգում, սպասի խոսեմ, հետ կզանգեմ ու տենց էլ չզանգեց»,-ասաց Հարություն Խաչատրյանը` նշելով, որ մինչեւ վերջ գնալու են Գեւորգի մահվան հանգամանքները բացահայտելու համար:
5 ամիս առաջ բանակ զորակոչված Գեւորգ Խաչատրյանը, հորեղբոր խոսքով, բանակից ոչ մի դժգոհություն չի ունեցել, հարազատների հետ հաճախ է խոսել եւ գոհ է եղել ծառայությունից:
«Գեւորգը մեկ քույր ունի, ինքը մեծն էր, ապրում էր ծնողների հետ: Դպրոցն ավարտեց, ընդունվեց «Քվանտ» վարժարան եւ գնաց բանակ: Շատ լավ էր, իրեն հարգում էին, բոլորը սիրում էին իրեն, շատ գոհ էր: Կարգին, դաստիարակաված տղա էր»,-ասաց նա:
Նշենք, որ Գեւորգ Խաչատրյանի հուղարկավորությունը տեղի կունենա դեկտեմբերի 2-ին Նորագավիթի գերեզմանատանը:
Հիշեցնենք, որ Հայաստանի քննչական կոմիտեի ԶՔԳՎ իններորդ կայազորային քննչական բաժնում քննություն է տարվում` պարզելու ՀՀ ԱԱԾ սահմանապահ զորքերի ժամկետային զինծառայող, շարքային Գեւորգ Խաչատրյանի մահվան հանգամանքները:
