ՌԴ-ի դեմ պատժամիջոցները պետք է երկարաձգել նպաստելու համար մինսկյան համաձայնությունների կատարմանը: Երեքշաբթի նման կարծիք է հայտնել պատժամիջոցների հարցերով ԱՄՆ-ի պետքարտուղարության կոորդինատոր Դանիել Ֆրիդը Բրյուսելի Եվրոպական քաղաքականության կենտրոնում կլոր սեղանի շուրջ:
«Պատժամիջոցները արդյունք են տալիս, դրանք փոխում են այն պայմանները, որոնցում Ռուսաստանը Ուկրաինայի վերաբերյալ որոշումներ է կայացնում: Առանց դրանց, կարծում եմ, Ուկրաինայում անհամեմատ ավելի վատ իրավիճակ կտեսնեինք ու խաղաղ գործընթաց չէր լինի: Կարծում եմ` ճիշտ կլինի ասել, որ պատժամիջոցները խաղաղ լուծման հնարավորություն են ստեղծել: Նշանակում է` դրանք պիտի պահպանվեն: Դրանք կուժեղացվեն, եթե Ուկրաինայի իրավիճակը վատթարանա: Սակայն ավելի հավանական է, որ դրանք կպահպանվեն` Ռուսաստանի վրա ճիշտ ճնշում ապահովելով, որպեսզի հնարավորություն տան առաջընթաց արձանագրել մինսկյան համաձայնությունների իրականացման գործում», - ենթադրում է Ֆրիդը, տեղեկացնում է ՏԱՍՍ-ը:
Ավելի վաղ ԵՄ-ի` արտաքին գործերի եւ անվտանգության քաղաքականության հանձնակատար Ֆեդերիկա Մոգերինին այլ կարծիք էր հայտնել` նշելով, որ դժվար է գնահատել Ռուսաստանի վրա պատժամիջոցների արդյունավետությունը:
ԵՄ-ը ՌԴ-ի դեմ իր պատժամիջոցային ռեժիմը կապել է մինսկյան համաձայնությունների ամբողջական կատարման հետ: Այդ կապակցությամբ դեկտեմբերի 17-18-ի գագաթնաժողովին Եվրամիության առաջնորդները քաղաքական որոշում կկայացնեն պատժամիջոցները երկարաձգելու վերաբերյալ, իսկ դրանք 4 կամ 6 ամսով երկարաձգելու վերաբերյալ ձեւական որոշումը կկայացվի հունվարին` ԵՄ-ի արտգործնախարարների հանդիպմանը: ՌԴ-ի դեմ ԵՄ-ի պատժամիջոցների ներկայումս գործող փաթեթի ժամկետը լրանում է հունվարի 31-ին:
