Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանն այսօր՝ դեկտեմբերի 1-ին, մեղավոր ճանաչեց հինգ աղջկա սեռական շահագործման նպատակով Դուբայ ուղարկելու մեջ մեղադրվող, Հրազդան քաղաքի 36–ամյա բնակչուհի Հերիքնազ Խաչատրյանին՝ դատապարտելով նրան 11 տարի 6 ամսվա ազատազրկման:
Տուժող Աննա Բ.-ին թրաֆիքինգի ենթարկելու փաստը ապացուցված չլինելու հիմնավորմամբ դատարանը անմեղ ճանաչեց եւ արդարացրեց Հերիքնազ Խաչատրյանին:
Մյուս չորս տուժողների մասով Հերիքնազը մեղավոր ճանաչվեց:
Դատական ակտի հրապարակումից հետո Հերիքնազի քրոջ դուստրը դատարանում բղավեց՝ «Մոք ջան, չնեղվես», ինչին Հերիքնազը արձագանքեց՝ «Ես ոչ մի բանից էլ, գիտեք, չեմ նեղվում»:
Ամբաստանյալի հարազատներին ու պաշտպանին դատարանի վճիռը դուր չեկավ: Պաշտպան Հրանտ Գեւորգյանը վճռի հրապարակումից հետո դիմեց դատարանին. «Պարոն Վարդանյան, ես ձեզնից նման բան չէի սպասում, էս ինչ անարդարություն է, տո»,- ասաց նա:
Նշենք, որ Մեղադրող դատախազը Հերիքնազ Խաչատրյանի համար 13 տարվա ազատազրկում էր պահանջել:
Հերիքնազ Խաչատրյանն իր վերջին խոսքում նշեց, որ որ ինքը մասնակցություն չի ունեցել հայ աղջիկներին Դուբայ տեղափոխելու եւ սեռական շահագործման ենթարկելու գործին:
«Էս իմ հոդվածը չի: Ձեզնից խնդրում եմ, միայն ճիշտ վճիռ կկայացնեք»,-ասաց ամբաստանյալը:
Նշենք, որ դատապարտյալի պաշտպան Հրանտ Գեւորգյանը պնդում էր, որ Հերիքնազ Խաչատրյանն իրեն մեղսագրվող արարքը չի կատարել, եւ գործում նրա արաքը հիմնավորող բավարար ապացույցներ չկան: Ըստ պաշտպանի՝ Հերիքնազ Խաչատրյանի նկատմամբ դատարանը պետք է արդարացման վճիռ կայացներ:
Հիշեցնենք, որ Հերիքնազ Խաչատրյանին մեղադրանք է առաջադրվել ՀՀ Քրեական օրենսգրքի 132 հոդվածի, 3-րդ մասի, 1-ին կետով, այն է` կազմակերպված հանցավոր խմբի կողմից անձանց մարմնավաճառության կամ սեռական այլ շահագործման, հարկադիր աշխատանքի կամ ծառայությունների ենթարկելը:
Նույն գործով Հերիքնազ Խաչատրյանի քույրը` Բավական Խաչատրյանը դատապարտվել է 11 տարվա ազատազրկման: Նա ավելի վաղ ցուցմունք էր տվել, թե քրոջ հետ միասին է թրաֆիքինգով զբաղվել, սակայն ավելի ուշ դատարանում հայտարարել էր, թե քննիչների ճնշումների ներքո է նման ցուցմունք տվել, եւ քույրն իրականում այդ գործի հետ կապ չունի։ Հերիքնազ Խաչատրյանը նույնպես իրեն առաջադրված մեղադրանքը չի ընդունում` պնդելով, որ Դուբայում ինքն է թարֆիքինգի զոհ դարձել:
