Սերբիայի մայրաքաղաք Բելգրադում դեկտեմբերի 2-ին մեկնարկում են ԵԱՀԿ անդամ երկրների արտգործնախարարների հանդիպումները: Ես արդեն ճանապարհին եմ: Այս մասին «Թվիթերի» իր էջում գրել է ԵԱՀԿ Մինսկի խմբի ամերիկյան համանախագահ Ջեյմս Ուորլիքը:
ԵԱՀԿ արտգործնախարարների խորհրդի ( ԱԳՆԽ ) հերթական՝ 22-րդ նիստը այս տարի կանցնի Բելգրադում դեկտեմբերի 3-4ը: Նիստը անցնելու է Սերբիայի նախագահությամբ՝ ի դեմս արտգործնախարար Իվիցա Դաչիչի:
ԵԱՀԿ ԱԳՆԽ իրենից ներկայացնում է Կազմակերպության բոլոր 57 անդամ երկրների արտգործնախարարների հանդիպման ձեւաչափ՝ տարվա ընթացքում արված աշխատանքի քննարկման ու անվտանգության առավել սուր հարցերի շուրջ տեսակետների փոխանակության համար: Ամենամյա նիստի ընթացքում տեղի է ունենում նաեւ նախագահության փոխանցման ընթացակարգը: Բելգրադում նախագահությունը Սերբիայից Գերմանիային կփոխանցվի: