Ադրբեջանական Նարդարան բնակավայրում տեղի ունեցող իրադարձություններում, իհարկե, նաեւ սոցիալական գործոն կա. նշվում էր, որ դա կրոնական գործոն է, բայց պարզվեց, որ հարցը սոցիալական է: Այս մասին NEWS.am-ի թղթակցի հետ զրույցում հայտարարեց ռուսաստանցի քաղաքագետ Ալեքսանդր Սկակովը:
Նրա խոսքով, պայթյունավտանգ կապ կա: «Այսինքն՝ գլխավորն Ադրբեջանի կայունության դեմ սպառնալիքն է, երբ երկու գործոններ՝ կրոնական եւ սոցիալական, համատեղվում են, իսկ մենք հիմա դա տեսնում ենք: Կարծում եմ՝ այս պայմաններում այն, որ իշխանությունները ժամանակին երկխոսության չգնացին, մեծ սխալ էր»,- ընդգծեց Սկակովը:
Հարցին, թե ինչ հետեւանքների կբերեն վերոնշյալ իրադարձությունները, քաղաքագետը պատասխանեց. «Նարդարանի իրադարձություններն ինքնին որեւէ բանի հանգեցնել չեն կարող: Բայց այն, որ դրանք առաջին ծիծեռնակներից են, որոնք կարող են շարունակություն ունենալ, լուրջ սպառնալիք է»:
Ավելի վաղ հաղորդվել էր, որ Բաքվից 30 կմ հեռավորությամբ գտնվող Նարդարանում վնասազերծվել է իսլամականների խումբ, որը մի շարք սադրանքներ, ահաբեկչական գործողություններ ու զանգվածային անկարգություններ էր ծրագրում: Գործողության հետեւանքով 4 ցուցարար եւ 2 ոստիկան է զոհվել: Դրանից հետո Ադրբեջանի կենտրոնական լրատվամիջոցներում հիստերիա բարձրացավ, իբր, պետականությունը խարխլելուն ուղղված արտաքին արշավի մասին: Իշխանությունների ուժային գործողությունը շարունակվել է նաեւ դեկտեմբերի 1-ին: