Սահմանադրության նոր նախագծով այլեւս մեկ քաղաքական ուժ՝ ելնի երկինք, իջնի ներքեւ, չի կարող դառնալ իշխանություն։ Այս մասին այսօր՝ դեկտեմբերի 1-ին, «Այո եւ ոչ» ռեալիթի շոուի շրջանակում քաղաքացիների հետ հանդիպման ժամանակ հայտարարել է «Այո»-ի ներկայացուցիչ Մարգարիտ Եսայանը։
«Իշխանություն դառնալու համար այդ ուժը պիտի իր կողքին ունենա այլ քաղաքական ուժեր եւս, որպեսզի կայուն մեծամասնություն ձեւավորվի, որ իշխանությունը կառավարումը վերցնի իր ձեռքը»,-պարզաբանել է նա՝ հավելելով, որ այն ուժերը, որոնք չեն կազմի մեծամասնություն կդառնան ընդդիմություն։
«Այն ուժերը, որոնք չեն մտնի կայուն մեծամասնության մեջ, կդառնան օպոզիցիա, բայց մեծամասնությունը ցանկացած հարց, ցանկացած պաշտոնյայի նշանակում չի կարող անել, եթե օպոզիցիայի ձայներից չունենա։ Լինի վարչապետ, Աժ նախագահ, երկրի նախագահ ԿԸՀ ղեկավար, ՄԻՊ եւ այլն։ Այս բոլորը՝ չհաշված օրենքները։ Հիմա մեծամասնությունը չէ՞ պիտի անի, բայց հաջորդ Խորհրդարանում արդեն իր ձայները բավարար չեն լինի, պիտի գա օպոզիցային ասի՝ օպոզիցիա ջան, քո ձայները տուր էս ինչին նշանակենք վարչապետ»,-բացատրել է «Այո»-ի ներկայացուցիչը։
Նրա խոսքով՝ այս փոփոխությունից հետո առանցքային պաշտոնների փոփոխությունը արագ ու դինամիկ է լինելու։
«Չի լինի մի անձ, կուսակցություն ու որոշի՝ ում նշանակի վարչապետ։ Երբ որ ասում ենք իշխանափոխություն խաղաղ ճանապարհով, դա նկատի ունենք»,-նշել է ՀՀԿ-ական պատգամավորը։