Բաքվի Սաբունչինյան շրջանի Նարդարան ավանի ապստամբած բնակչության դեմ Ադրբեջանի ներքին զորքերի չդադարող ուժային գործողության պայմաններում պետական «Aztv» հեռուստաալիքը հիստերիա է բարձրացրել պետական կարգին սպառնացող վտանգի մասին:
Երեկոյան լրատվական «Հեբերլար» թողարկման մեջ ադրբեջաներեն եւ ռուսերեն լեզուներով տենդենցիոզ հայտարարություն է ընթերցվել, որից հետեւում է, որ Նարդարան ավանի բնակչությունը ամբողջովին աջակցում է 24 ձերբակալվածների խմբին, բարիկադներ է կառուցել եւ դիմադրություն է ցույց տալիս: «Կրոնական դարավոր հանդուրժողականության» մասին զառամախտավոր պնդումների ֆոնին (երեւում է` դրա արդյունքն էր 90-ականների սկզբին Բաքվի,Կիրովաբադի եւ Սումգայիթի քրիստոնյա բնակչության բռնի տեղահանումը) գլխավոր հեռուստաալիքն իրականում արձանագրել է, որ իշխանություններն անկարող են վերականգնել պետական մարմինների, դպրոցների եւ մանկապարտեզների աշխատանքը:
Հաջորդ սյուժեում առանց անունների ելույթ են ունեցել Իլհամ Ալիեւի «Նոր Ադրբեջան» իշխող կուսակցության պաշտոնյաներ, որոնք ամբողջ ժողովրդի անունից դատապարտել են գյուղի ապստամբած բնակիչներին: Եվ իհարկե, «Aztv»-ն չէր կարող զերծ մնալ «հայերի ջրաղացին ջուր լցնելու» համար մեղադրելուց բոլոր լրատվամիջոցներին, որոնք փորձում են ինչ-որ կերպ լուսաբանել ամբողջությամբ զինվորականներով շրջապատված գյուղում տեղի ունեցող դեպքերը: Իսլամիստների դեմ այսպես կոչված գործողության եւ խաղաղ բնակչության շրջանում զոհերի մասին ոչ մի հաղորդագրություն չի հետեւել:
