Սերժ Սարգսյանը հայտարարել է՝ Սահմանադրության փոփոխությունից հետո չի հավակնելու, նախագահի, երկրի վարչապետի, Ազգային ժողովի նախագահի պաշտոններին։ Այս մասին այսօր՝ դեկտեմբերի 1-ին, «Այո եւ ոչ» ռեալիթի շոուի շրջանակում քաղաքացիների հետ հանդիպման ժամանակ հայտարարել է «Այո»-ի ներկայացուցիչ Սամվել Ֆարմանյանը։
«Մեր քաղաքական ընդդիմախոսները, հատկապես Հայ ազգային կոնգրեսը՝ պարոն Տեր-Պետրոսյանի գլխավորությամբ, ասում էին, որ այս փոփոխությամբ Սերժ Սարգսյանը դառնալու է ԱԺ նախագահ եւ շարունակելու է մնալ իշխանության ղեկին։ Դրանից հետո, երբ Սահմանադրության տեքստը բաժանվեց ու արձանագրվեց, որ ԱԺ նախագահը եւս կարող է հետ կանչվել այնքան ձայնով, որքան ընտրվել է, ու մեկ այլ առիթով Սերժ Սարգսյանն էլ ասաց՝ մեկ անձը երկու անգամից ավել չպետք է հավակնի ՀՀ-н ղեկավարելու դերին, քաղաքակaն հակառակորդները մեջտեղ են բերել նոր «համոզիչ» փաստարկ։ Այն է, թե նախագահը կարող է մնալ ՀՀԿ ղեկավար, ՀՀԿ-ն էլ ստանա մեծամասնություն ու կուսակցության գրասենյակից շարունակի իշխել»,-ասել է ՀՀԿ խմբակցության պատգամավորը։
Վերջինս հիշեցրել է, որ ՀՀ ողջ պատմության մեջ չի եղել դեպք, որ որեւէ կուսակցություն ունենա 51 տոկոս քվե առանց մեծամասնական պատգամավորների։ Փոփոխությամբ անցում է կատարվելու ամբողջական համամասնական ընտրակարգին, ինչը իշխանափոխության հնարավորություն է ընձեռում։
ՀՀ ողջ պատմության ընթացքում չի եղել որեւէ քաղաքական ուժ, որ 50 տոկոսից ավել քվե ստանա ժողովրդի կողմից առավել եւս այսօրվա սոցիալ-տնտեսական բարդ պայմաններում։
«Նոր Սահմանադրությունը եթե ընդունվի, առաջին անգամ մեր պատմության մեջ հնարավորություն է տրվելու, որպեսզի ՀՀ-ում խաղաղ եղանակով առանց ցնցումների, արյան ու թշնամանքի տեղի ունենա իշխանության փոխանցում մի անձից մյուսին»,-նշել է «Այո»-ի ներկայացուցիչը՝ հավելելով, որ գործող Սահմանադրությունը եւ դրա նախորդը նման հնարավորություն թույլ չեն տվել։
«Դրա վառ ապացույցը այն պատմությունն է, որն անցել ենք 91 թվից սկսած։ Ցանկացած իշխանություն վերարտադրվել է՝ չնայած մեկը մեկից ուժեղ ընդդիմությանը»,-ասել է Սամվել Ֆարմանյանը։