«Ժառանգություն» կուսակցության փոխնախագահ Արմեն Մարտիրոսյան սահմանադրական փոփոխությունների դեմ պայքարող «Նոր Հայաստան»-ի հրավիրած հանրահավաքի մասնակիցներին կոչ արեց շուրջօրյա հանրահավաքի ու երթի ժամանակ խուսափել ոստիկանների հետ բախումներ հրահրող սադրիչներից:
«Ոստիկանները մեր եղբայրներն են, մեր հարազատները, թույլ չտաք իշխանությունների իրենց սադրիչների միջոցով հրահրել ժողովուրդ-իշխանություն բախումներ: Ոչ մեկ մատով չկպչի ոչ մի ոստիկանի»,- իր ելույթում հայտարարեց Արմեն Մարտիրոսյանը:
«Ժառանգության» ներկայացուցիչը միաժամանակ դիմեց ուժային կառույցների ներկայացուցիչներին՝ հիշեցնելով, որ հանրահավաքի մասնակիցներն իրենց հարազատներն են ու ընկերները, պայքարում են նաեւ իրենց ապագայի համար՝ կոչ անելով չկատարաել իշխանությունների ապօրինի հրահանգները:
Արմեն Մարտիրոսյանը նաեւ կոչ արեց ուշադրություն չդարձնելով եղանակային պայմաններին եւ անհարմարություններին՝ պայքարել իրենց ապագայի համար:
Նշենք, որ հանրահավաքին կհաջորդի երթ, որից հետո կազմակերպիչները նախատեսում են շուրջօրյա հանրահավաքներ ստեղծել Ազատության հրապարակում:
Նշենք, որ որը ըստ կազմակերպիչների՝ այսօր տրվելու է համապետական շուրջօրյա հանրահավաքների սկիզբը, եւ նրանք չեն հեռանալու, մինչեւ չհասնեն իշխանափոխության: «Նոր Հայաստան» հանրային փրկության ճակատի «Ընդդիմության միասնական շտաբի» ղեկավար Ժիրայր Սեֆիլյանը քաղաքացիներին կոչ է արել իրենց հետ վրաններ բերել հանրահավաքին, թեեւ քաղաքապետարանը մերժել էր Ազատության հրապարակում վրան տեղադրելու թույլտվության՝ «Նոր Հայաստանի» դիմումը:
Նշենք, որ «Ընդդիմության միասնական շտաբի» կազմում են «Ժառանգություն» կուսակցությունը, Հիմնադիր խորհրդարանը, «Ժողովրդավարական հայրենիք» կուսակցությունը, «Ոտքի՛, Հայաստան» քաղաքացիական շարժումը:
«Ոչ»-ի ճակատի մաս կազմող ու «Ընդդիմության միասնական շտաբից» առանձին հանդես եկող «Չեք անցկացնի» նախաձեռնությունը, որին միացել է նաեւ Հայ ազգային կոնգրեսը, Հայաստանի ժողովրդական կուսակցությունը, հայտարարել է, որ դեկտեմբերի 1-ին գնալու է Ազատության հրապարակ եւ սատարելու է «Նոր Հայաստանին»: «Ոչ»-ի ճակատի առաջիկա հանրահավաքը նախատեսված է դեկտեմբերի 3–ին:
Հիշեցնենք, որ սահմանադրական փոփոխությունների հանրաքվեն տեղի կունենա դեկտեմբերի 6-ին: Նոր սահմանադրությամբ նախատեսվում է անցում կատարել կառավարման խորհրդարանական համակարգի: