Իշխանական վերնախավն իրեն դրսեւորել է որպես ոհմակ, եւ մենք գալիս ենք պատժելու այդ մարդկանց։ Այդ մասին այսօր՝ դեկտեմբերի 1-ին Ազատության հրապարակում «Նոր Հայաստան» շարժման հանրահավաքում հայտարարել է ազատամարտիկ, «Ընդդիմության միացյալ շտաբի» պետ Ժիրայր Սեֆիլյանը։ (ֆոտոռեպորտաժ)
«Երկար ժամանակ մեր ժողովուրդը սպասում էր այս օրվան։ Քիչ առաջ ես ընդդիմադիր գործընկերներին հորդորեցի, որ ժամ առաջ մեր ռեսուրսները համախմբենք։ Այս հրապարակից առաջիկա ժամերին, եթե պետք լինի օրերից ոչ ոք չի հեռանալու։ Մենք որտեղ ուզենք՝ հրապարակներ են սարքելու»,- ասել է Սեֆիլյանը։
Նա նշեց, թե երկու տարբերակ ունեն, կամ սպասում են մի շաբաթ, հետո որոշում, կամ հենց հիմա սկսում իշխանափոխությունը։ Հավաքված բազմությունը հավանություն տվեց, ինչից հետո Ժիրայր Սեֆիլյանը բղավեց. «Ընդդիմադիր ուժեր, տեսնում եք, թե ժողովուրդն ինչ է ուզում»։
Սեֆիլյանը հիշեց ընդդիմադիր ուժերին։ «Նիկոլ Փաշինյան, սկսել ա, արի միացի»,- բղավեց նա, այնուհետ հավաքվածները սկսեցին վանկարկել «Հիմա, հիմա»։ Սեֆիլյանը կոչով նաեւ դիմեց Ստեփան Դեմիրճյանին՝ կոչ անելով գալ եւ միանալ իրենց։
«Քանի որ գործ ունենք ոհմակի հետ, հակառակորդի վերնախավը իրեն դրսեւորել է որպես ոհմակ։ Մենք գալիս ենք իշխանության՝ նաեւ պատժելու այս մարդկանց։ Մենք չենք մոռացել մարտի 1-ը»,- ասել է ազատամարտիկը։