Լարված իրավիճակ է ստեղծվել ՀՀԿ կենտրոնական գրասենյակի առջեւ։
NEWS.am-ի թղթակիցը հաղորդում է, որ «Նոր Հայաստան» շարժման կազմակերպած երթի մասնակիցները փորձում են մոտենալ ՀՀԿ գրասենյակին, սակայն ոստիկանները պատ են կազմել գրասենյակի առջեւ եւ թույլ չեն տալիս առաջ շարժվել: Ոստիկանների եւ երթի մասնակիցների միջեւ սկսեց քաշքշուկ, ոստիկանների թիվն ավելացավ: Րաֆֆի Հովհաննիսյանի մոտ մի փունջ ծաղիկ կա, որոնք նա փորձում է դնել գրասենյակի մոտ:
Հրմշտոցի ժամանակ Րաֆֆի Հովհաննիսյանին գետնին գցեցին, ցուցարարները բարձրացրին նրան։
Ոստիկանների գործողությունները ղեկավարում է Երեւանի փոխոստիկանապետ Վալերի Օսիպյանը:
Վալերի Օսիպյանը բանակցում է Ժիրայր Սեֆիլյանի հետ, նրա խոսքով՝ երթի մասնակիցները արհեստական բախումներ են ստեղծում, նրանք իրավունք չունեն շենքին մոտենալ: Ժիրայր Սեֆիլյանը պնդում է, որ ոստիկանները պետք է թույլ տան ծաղիկները դնել շենքի մոտ: Նա երթի մասնակիցներին սադրանքների չգնալու ու զսպվածության կոչ է անում:
Երթը գլխավորում են Հիմնադիր խորհրդարանի անդամները եւ «Ժառանգություն» կուսակցության առաջնորդ Րաֆֆի Հովհաննիսյանը: Երթն ուղեկցում են մեծ թվով ոստիկաններ։
Երթի մասնակիցներն իրենց հետ տանում են ՀՀ դրոշները, «Պայքարը կյանք է, անտարբերությունը՝ մահ», «Ազգը կամ տականքը» գրությամբ պաստառներ:
NEWS.am-ի թղթակիցը հաղորդում է, որ Ազատության հրապարակում հանրահավաքի մասնակիցների հերթապահ խումբ է մնացել:
Հիշեցնենք, որ շարժումը քաղաքապետարանից թույլտվություն է վերցրել նաեւ հրապարակում վրաններ տրամադրելու վերաբերյալ: Քաղաքապետարանը մերժել է դիմումը:
Երթից հետո կազմակերպիչները նախատեսում են շուրջօրյա հանրահավաքներ սկսել Ազատության հրապարակում:
Նշենք, որ ըստ կազմակերպիչների՝ այսօր տրվելու է համապետական շուրջօրյա հանրահավաքների սկիզբը, եւ նրանք չեն հեռանալու, մինչեւ չհասնեն իշխանափոխության:
«Նոր Հայաստան» հանրային փրկության ճակատի ձեւավորած «Ընդդիմության միասնական շտաբի» կազմում են «Ժառանգություն» կուսակցությունը, Հիմնադիր խորհրդարանը, «Ժողովրդավարական հայրենիք» կուսակցությունը, «Ոտքի՛, Հայաստան» քաղաքացիական շարժումը: Հանրահավաքին մասնակցում են նաեւ ԱԻՄ առաջնորդ Պարույր Հայրիկյանը, հանրահավաքին ուղերձ հղեց ՀԱԿ ներկայացուցիչ Վլադիմիր Կարապետյանը:
Հիշեցնենք, որ սահմանադրական փոփոխությունների հանրաքվեն տեղի կունենա դեկտեմբերի 6-ին: Նոր սահմանադրությամբ նախատեսվում է անցում կատարել կառավարման խորհրդարանական համակարգի:
