Երեւանի փոխոստիկանապետ Վալերի Օսիպյանը թույլ չտվեց, որ «Ժառանգություն» կուսակցության առաջնորդ Րաֆֆի Հովհաննիսյանը մոտենա ՀՀԿ գրասնյակի շենքին եւ ծաղիկներ դնի գրասենյակի մոտ:
Փոխոստիկանապետը իր որոշումը բացատրեց նրանով, որ երթի մասնակիցները հնչեցնում են ագրեսիվ եւ անհնազանդության կոչեր եւ ինքը չի կարող թույլ տալ նրանց մոտենալ շենքին: Նա կոչ արեց ծաղիկները բերել մեկ ուրիշ օր:
«Եթե այդ ծաղիկները դնեք, կդիտվի, որ դուք տանում եք բախման»,- ասաց Վալերի Օսիպյանը:
Հիմնադիր խորհրդարանի անդամ Ժիրայր Սեֆիլյանը հայտարարեց, որ բախումներից խուսափելու համար երթը կշարունակվի մեկ այլ ճանապարհով:
Միեւնույն ժամանակ, նա կրկնեց, որ չեն վերադառնալու տուն, մինչեւ չձերբազատվեն ռեժիմից:
Այս պահին «Նոր Հայաստանի» քաղաքական խորհուրդը Հանրապետության փողոցում՝ ՀՀԿ գրասենյակից մի քանի մետր հեռու կանգնած խորհրդակցում է, որոշում հետագա անելիքները:
Նշենք, որ Ազատության հրապարակում հանրահավաքի մասնակիցների հերթապահ խումբ է մնացել:
Հիշեցնենք, որ շարժումը քաղաքապետարանից թույլտվություն է վերցրել նաեւ հրապարակում վրաններ տրամադրելու վերաբերյալ: Քաղաքապետարանը մերժել է դիմումը:
Երթից հետո կազմակերպիչները նախատեսում են շուրջօրյա հանրահավաքներ սկսել Ազատության հրապարակում:
Ըստ կազմակերպիչների՝ այսօր տրվելու է համապետական շուրջօրյա հանրահավաքների սկիզբը, եւ նրանք չեն հեռանալու, մինչեւ չհասնեն իշխանափոխության:
Սահմանադրական փոփոխությունների դեմ պայքարող «Նոր Հայաստան» հանրային փրկության ճակատի ձեւավորած «Ընդդիմության միասնական շտաբի» կազմում են «Ժառանգություն» կուսակցությունը, Հիմնադիր խորհրդարանը, «Ժողովրդավարական հայրենիք» կուսակցությունը, «Ոտքի՛, Հայաստան» քաղաքացիական շարժումը: Հանրահավաքին մասնակցում են նաեւ ԱԻՄ առաջնորդ Պարույր Հայրիկյանը, հանրահավաքին ուղերձ հղեց ՀԱԿ ներկայացուցիչ Վլադիմիր Կարապետյանը:
Հիշեցնենք, որ սահմանադրական փոփոխությունների հանրաքվեն տեղի կունենա դեկտեմբերի 6-ին: Նոր սահմանադրությամբ նախատեսվում է անցում կատարել կառավարման խորհրդարանական համակարգի: