Դեկտեմբերի 1-ին, ժամը 18.30-ին տեղեկություն է ստացվել, որ Էջմիածին-Արմավիր ավտոճանապարհի 6-րդ կմ-ին ավտոմեքենա է շրջվել. անհրաժեշտ է փրկարարների օգնությունը:
Դեպքի վայր է մեկնել մեկ մարտական հաշվարկ:
Պարզվել է, որ Մ-5 ավտոճանապարհին` Արշալույս գյուղի մոտակայքում, դեռեւս չբացահայտված հանգամանքներում «Մերսեդես» մակնիշի 79 FF 007 պետհամարանիշով ավտոմեքենան դուրս է եկել ճանապարհի երթեւեկելի հատվածից եւ բախվելով ճամփեզրի արգելապատնեշին՝ շրջվել:
Մինչ հրշեջ-փրկարարների կանչի վայր հասնելը` ավտոմեքենայի վարորդ՝ 1982 թ. ծնված Ա. Պ.-ը եւ ուղեւոր՝ 1978 թ. ծնված Է. Հ.-ը հոսպիտալացվել են Էջմիածին քաղաքի ԲԿ, որտեղ վարորդը, ստանալով համապատասխան բուժօգնություն, դուրս է գրվել, իսկ ուղեւորի առողջական վիճակը բժիշկները գնահատել են միջին ծանրության:
Հրշեջ-փրկարարները հոսանքազրկել են ավտոմեքենան եւ փակել գազի բալոնի փականը:
