Ադրբեջանը հետ է կանչել ՄԱԿ-ի Գլխավոր ասամբլեայի 64-րդ նստաշրջանի օրակարգում իր կողմից ներկայացրած «Իրավիճակը Ադրբեջանի օկուպացված տարածքներում» անվանումը կրող բանաձեւը: Այս մասին NEWS.am-ին հայտնեցին ՄԱԿ-ի իր աղբյուրները: Նման որոշում կայացնելու պատճառների մասին պաշտոնական մեկնաբանություններ դեռ չեն արվել:
Ավելի վաղ Հայաստանի ԱԳ նախարար Էդվարդ Նալբանդյանը հայտարարել էր, որ Ադրբեջանի կողմից ՄԱԿ-ի Գլխավոր ասամբլեայում ԼՂ վերաբերյալ բանաձեւի ներկայացումն ապակառուցողական քայլ է, որը կարող է լուրջ վնաս հասցնել բանակցային գործընթացին:
«ՄԱԿ-ի անդամ պետությունների մեծամասնությունը գտնում է, որ այս կարգի հարցերը չպետք է տեղափոխել Գլխավոր ասամբելա, պետք է քննարկել հաստատված բանակցային ձեւաչափերի շրջանակներում»,- ասել է նախարարն ու հավելել. «Անվտանգության խորհրդի հինգ մշտական անդամներից եւ ոչ մեկը կողմ չքվեարկեց, իսկ եռանախագահող երկրները դեմ քվեարկեցին: Ադրբեջանն օգտագործում է Իսլամական կոնֆերանս կազմակերպությունը` չարաշահելով իսլամական համերաշխության գործոնը: Շատ վտանգավոր են փորձերը կրոնական բնույթ հաղորդել այս կարգի հիմնախնդիրներին»:
Հարցին, թե ի՞նչ է անում Հայաստանը Ադրբեջանի այդ նախաձեռնության դեմ, Է. Նալբանդյանը պատասխանել է. «Դիվանագիտությունը նման է սառցալեռան, այն մասը, որ երեւում է դա շատ փոքր մասն է, մեծ մասը անտեսանելի է, դա հենց այն աշխատանքն է, որի մասին ընդունված չէ մանրամասն հայտարարել: Հակառակ դեպքում ակնկալվող արդյունքները կարող են նվազ լինել:
Այո, մենք նախաձեռնում ենք անհրաժեշտ քայլեր: Միջազգային հանրության կարծիքն ու մոտեցումը Լեռնային Ղարաբաղի կարգավորման վերաբերյալ, որոնք ընդունվել են վերջին ժամանակահատվածում, համահունչ են նաեւ մեր մոտեցումներին: Եթե Ադրբեջանը ոտնահարում է ուժի չկիրառման եւ ուժի սպառնալիքի չկիրառման միջազգային իրավունքի կարեւորագույն սկզբունքը, ապա դրան հակառակ ամբողջ միջազգային հանրությունը կարեւորում է այս սկզբունքը որպես հիմնարար ԼՂ խնդրի կարգավորման գործընթացում:
Նշենք, որ «Իրավիճակը Ադրբեջանի օկուպացված տարածքներում» բանաձեւում խոսք է գնում ադրբեջանցի փախստականների իրենց տները վերադառնալու, ինչպես նաեւ «ադրբեջանի օկուպացված տարածքներում» մշակույթի հուշարձանների ոչնչացման անթույլատրելիության մասին: