Երեւանի «Շենգավիթ» համայնքում գործող «Գուդ վին» բուքմեյքերական գրասենյակում դեկտեմբերի 24-ին սպանված Արթուր Նազարյանը մոտ 20 օր առաջ էր ընդունվել աշխատանքի: Այս մասին հայտնում են NEWS.am-ի աղբյուրները:

Մեր տեղեկություններով,  Արթուր Նազարյանը գրասենյակի գանձապահն էր, գիշերը ժամը 02:00-ի սահմաններում փակել է դրամարկղը եւ գրասենյակից դուրս գալու պահին է դեպքը տեղի ունեցել: Այս պահին տարբեր վարկածներ են շրջանառվում սպանության շարժառիթների վերաբերյալ: Վարկած կա նաեւ, որ Նազարյանը նախկինում խնդիրներ է ունեցել սպանությունը կատարած անձի հետ: Նշենք, որ սպանության գործով արդեն կա մեղադրյալ: Վարույթն իրականացնող մարմինը որոշում է կայացրել այդ անձին որպես մեղադրյալ ներգրավվելու մասին, եւ հանձնարարություն է տրվել ոստիկանության համապատասխան ստորաբաժանումներին օպերատիվ միջոցառումներ ձեռնարկել նրան հայտնաբերելու եւ վարույթն իրականացնող մարմնին ներկայացնելու ուղղությամբ:

Իրավապահ մարմինները սպանված երիտասարդի գրպանում հայտնաբերել են մոտ 150 հազար դրամ:

Ավելի վաղ Քննչական կոմիտեն հայտնել էր, որ նախնական տվյալներով՝ 2015թ. դեկտեմբերի 23-ի լույս 24-ի գիշերը՝ մինչև ժամը 11-ն ընկած ժամանակահատվածում, տեղի է ունեցել ավազակային հարձակում՝ գումար հափշտակելու դիտավորությամբ։ Առերևույթ հանցագործություն կատարած անձը որպես զենք օգտագործվող սուր կտրող ծակող գործիքով բազմաթիվ հարվածներ է հասցրել գրասենյակում աշխատող Արթուր Նազարյանի որովայնի, պարանոցի և կրծքավանդակի հատվածներին՝ սպանելով նրան ու հափշտակել գումար:

Դեպքի առթիվ հարուցվել է քրեական գործ Քրեական օրենսգրքի 104-րդ հոդվածի 2-րդ մասի 8-րդ կետով և 175-րդ հոդվածի 2-րդ մասի 4-րդ կետով։