Յուրաքանչյուր ֆուտբոլիստի համար մեծ պատիվ է է խաղալ ազգային հավաքականում, բայց ափսոս վերադարձս այդքան էլ լավ չստացվեց: Այս մասին NEWS.am-ի թղթակից Վերա Մարտիրոսյանի հետ զրույցում նշեց Հայաստանի ազգային հավաքականի եւ Երեւանի «Ալաշկերտի» դարպասապահ Գեւորգ Կասպարովը՝ ամփոփելով 2015 թվականը:
Ինչպիսի՞ն էր անցնող տարին քեզ համար, Գեւորգ:
Տարին լավ էր ակումբային կարիերայիս համար, բայց վատը՝ հավաքականում: Այնտեղ լավ արդյունքներ չգրանցեցինք:
Տարվա ամենահիշվող պահը:
Երեւի թե այն, որ «Ալաշկերտը» Եվրոպայի լիգայի որակավորման փուլի առաջին խաղում՝ մնալով տասը հոգով, շատ դժվարին խաղով կարողացավ առաջ անցնել բավականին դժվար մրցակցից:
Երկար դադարից հետո կրկին դարձար հավաքականի գլխավոր դարպասապահը: Սպասո՞ւմ էիր որ դա կլինի հենց այս տարի:
Յուրաքանչյուր ֆուտբոլիստի համար դա մեծ պատիվ է: Բայց ափսոս վերադարձս այդքան էլ լավ չստացվեց:
Ի՞նչ ծրագրեր կան 2016-ի հետ կապված: Հնարավո՞ր է մեկնես այլ երկիր խաղալու:
Ապագայի հետ դեռ ծրագրեր չեմ կազմում, բայց բացառված չէ մեկնելու տարբերակը: Այս պահին ես «Ալաշկերտի» ֆուտբոլիստ եմ, եւ մենք լավ թիմ ունենք:
Ինչպե՞ս ես վերաբերվում հայկական ֆուտբոլում տեղի ունեցած վերջին իրադարձություններին:
Հավաքականը շատ վատ հանդես եկավ եւ երկրպագուների դժգոհությունը արդարացի էր:
Սպասո՞ւմ էիր, որ ազգային հավաքականը կգլխավորի Վարուժան Սուքիասյանը:
Հայ մասնագետ թեկնածուները շատ չէին, այնպես որ անսպասելի չէր:
Ի՞նչ նվերներ են սպասում Ձմեռ պապից ֆուտբոլիստի երեխաները:
Քանի որ տղաներս ֆուտբոլ են պարապում, նրանց նվերները կապված են ֆուտբոլի հետ: Երկու շաբաթ առաջ արդեն նամակը գրել են Ձմեռ պապիկին: Ձմեռ պապն էլ կբերի երեւի նրանց ուզածը:
Վերա Մարտիրոսյան/Vera&Football