Հայաստանի հավաքականի կիսապաշտպան Մարկոս Պիզելին հունվարի 19-ին տեղափոխվել է Սաուդյան Արաբիան ներկայացնող «Ալ-Ռաեդ» ակումբ: Մինչ այդ Մարկոսը երկկողմանի համաձայնությամբ խզել էր պայմանագիրը ղազախական «Ակտոբեի» հետ: NEWS.am-ի թղթակից Վերա Մարտիրոսյանի հետ զրույցում Մարկոսը պատմել է, թե ինչու է ընտրել հենց արաբական թիմը:
Մարկոս, ինչո՞ւ որոշեցիր տեղափոխվել հենց Սաուդիան Արաբիան ներկայացնող «Ալ-Ռաեդ» ակումբ: Չկայի՞ն այլ առաջարկներ:
Որոշեցի տեղափոխվել այնտեղ, քանի որ նրանք իսկապես ցանկացան ինձ ձեռք բերել: Նրանց համար կարեւոր չէր իմ տարիքը: Առաջարկեցին շատ լավ պայմանագիր, չնայած կարճ ժամանակով: Ես այլ առաջարկներ էլ ունեի, բայց ոչ մեկն այս առաջարկի պես իրական չէր, ավելի շատ սպեկուլյացիաների էին նման:
Վստահ եմ՝ բոլորը կարծելու են, որ գնացիր այնտեղ գումարի համար:
Իհարկե, գումարն առաջին բանն էր, ինչի մասին մտածեցի: Ես պետք է մտածեմ ապագայիս մասին՝ հատկապես հիմա:
Հնարավո՞ր է ամռանը այլ թիմ տեղափոխվես:
Եթե ռեալ առաջարկ լինի, ապա հնարավոր է եւ տեղափոխվեմ այլ թիմ:
Հիշեցնենք, որ «Ալ-Ռաեդը» Սաուդյան Արաբիայի ընթացիկ առաջնության 13 տուրից հետո 14 թիմերի մեջ զբաղեցնում է 12-րդ հորիզոնականը:
Վերա Մարտիրոսյան/ Vera&Football