Համաշխարհային հայկական երիտասարդական ՈՍՏԱՅՆ-ը եւ «ՀԱԼԷՊ» հայրենակցական բարեսիրական ՀԿ-ն այսօր`հունվարի 22-ին, Սիրո բարեխոս Սուրբ Սարգսի տոնին նվիրված երիտասարդական միջոցառում անցկացրին:
NEWS.am-ի հետ զրույցում միջոցառման կազմակերպիչներից Հակոբ Կազանչյանը նշեց, որ իրենց նպատակն է խրախուսել եկեղեցական եւ ազգային տոնի տարածումը երիտասարդության շրջանում, ինչպես նաեւ Հայրենիքում բնակվող սիրիահայ երիտասարդների ներգրավումը քաղաքացիական կյանք։
«Մեր նպատակը ազգային տոների պահպանումն է երիտասարդության շրջանում, որպեսզի հետագայում նրանք իրենց ընտանիքներում սերմանեն այդ ավանդույթները եւ դրանցով ապրեն»,-ասաց Հակոբ Կազանչյանը:
Միջոցառման մասնակիցների բաժանվեցին ԵԵ ՈՍՏԱՅՆ-ի եւ Երիտասարդական ակումբների դաշնության տեղացի եւ եվրոպացի կամավորների կողմից պատրաստած աղի բլիթներ:
Միջոցառման ընթացքում տեղաբնակ եւ սիրիահայ երիտասարդները համատեղ հանդես եկան ազգային երգի եւ պարի կատարումներով` ներկայացնելով Քեսապի պարը, մրցութային խաղեր, հաղթողներին բաժանվեցին նվերներ:
Երիտասարդներին օրհնեց Նորագավթի Սուրբ Գեւորգ եկեղեցու հոգեւոր հովիվ տեր Վարդան քահանա Գափոյանը, ով մեկնաբանեց տոնի խորհուրդն ու ներկայացրեց այն նշելու արարողակարգը:
«Սուրբ Սարգսի կերպարը անդավաճան նվիրումի խորհրդանիշ է, որը օգնել է մեզ, զորացրել է, որպեսզի մենք մեր հավատի մեջ անսասան մնանք: Եւ այսօր յուրաքանչյուրս, հատկապես` երիտասարդները մեկը մյուսին սիրելիս պետք է երբեք չդավաճանենք մեր սերը ու դրա հետ մեկտեղ նաեւ չդավաճանենք այն համոզմունքները, որոնք քարոզում է Ավետարանը»,-NEWS.am-ի հետ զրույցում ասաց տեր Վարդան քահանա Գափոյանը:
Միջոցառումը ավարտվեց երիտասարդների շուրջպարով, որը խորհրդանշում էր միասնականությունն ու հայրենիքում ապրելու, այն շենացնելու հաստատակամությունը:
Նշենք, որ միջոցառման աջակիցներն էին Արարատյան Հայրապետական թեմը, Երիտասարդական ակումբների դաշնությունը, «Հայկական Փի Ար ասոցիացիա» գիտատեղեկատվական ՀԿ-ն:
