Վերջին օրերի ամենաքննարկվող թեմաներից մեկը Հայաստանի ազգային հավաքականի եւ Մոսկվայի «Սպարտակի» կիսապաշտպան Արաս Օզբիլիսի տեղափոխությունն էր թուրքական «Բեշիկթաշ»: Հունվարի 25-ին Օզբիլիսը մեկնեց Մադրիդ, որտեղ պետք է պայմանագիր կկնքի իսպանական «Ռայո Վալեկանո» թիմի հետ: Ֆուտբոլիստն այնտեղ հանդես կգա վարձավճարով մինչեւ ամառ: NEWS.am-ի թղթակից Վերա Մարտիրոսյանի հետ զրույցում Արասը պատմեց, թե ինչու ընտրեց թուրքական ակումբը, եւ ինչպես է վերաբերվում հայ երկրպագուների արձագանքին:
Արաս, ինչո՞ւ ընտրեցիր հենց «Բեշիկթաշը»: Այլ տարբերակներ չունեի՞ր:
Ես տեղափոխվեցի «Բեշիկթաշ», քանի որ դա շատ մեծ թիմ է: Ես այլեւս չէի խաղում «Սպարտակում», իսկ ֆուտբոլիստները ցանկանում են խաղալ ֆուտբոլ: «Սպարտակը» ցանկանում էր վաճառել ինձ, իսկ «Բեշիկթաշն» իսկապես ցանկանում էր ինձ գնել: Շատ դժվար է թիմի համար ձեռք բերել մի ֆուտբոլիստի, որը չի խաղացել մեկ ու կես տարի, բայց «Բեշիկթաշի» նախագահն ու ողջ թիմը հավատում են ինձ, իսկ դա իմ որոշումը կայացնելը դարձրեց ավելի հեշտ: Թիմն ինձ արժանացրեց հիանալի ընդունելության եւ ցույց տվեցին, որ հավատում են:
Ինչո՞ւ «Բեշիկթաշը» որոշեց քեզ վարձավճարով հանձնել իսպանական «Ռայո Վալեկանոյին»:
«Բեշիկթաշը» ինձ վարձավճարով հանձնեց իսպանական «Ռայո Վալեկանոյին», քանի որ ցանկանում են, որ ես ունենամ ֆուտբոլային լավ պրակտիկա: Նրանք ցանկանում են որպեսզի ես դառնամ այնպիսի ֆուտբոլիստ, ինչպիսին առաջ էի: Ես այնտեղ կխաղամ մինչեւ ամառ, իսկ հետո ավելի ուժեղացած կվերադառնամ «Բեշիկթաշ»:
Գիտե՞ս, որ շատ հայ երկրպագուների համար քո՝ Թուրքիա տեղափոխվելը տհաճ լուր էր:
Ես ֆուտբոլիստ եմ ու միակ բանը, որ ցանկանում եմ, դա կրկին ֆուտբոլ խաղալն է: Ես ֆուտբոլիստ եմ, այլ ոչ թե քաղաքական գործիչ: Երբեք չէի ցանկանա, որպեսզի իմ ժողովուրդն այդպես մտածեր: Ես հարցին այլ կերպ եմ նայում: Եթե ես ունենամ մշտական խաղային պրակտիկա, ես կրկին կկարողանամ խաղալ Հայաստանի ազգային հավաքականի կազմում եւ կրկին օգնել նրանց: Վերջերս ես հավաքականում մշտապես հանդես չէի գալիս: Կարծում եմ՝ «Բեշիկթաշում» ավելի շատ խաղալով, ես կկարողանամ ավելի շատ բան անել Հայաստանի ազգային հավաքականի համար:
Ռուսական մամուլը հայտնում էր, որ դու եւ քո գործակալն եք դիմել թուրքական ակումբին, այլ ոչ թե հակառակը: Ի՞նչ կասես այդ մասին:
Ես այլեւս «Սպարտակի» պլաններում չկայի: Իսկ «Բեշիկթաշը» ինձ դեռ այն ժամանակ էր ցանկանում գնել: Առաջինը թիմն է ցանկություն հայտնել:
Այսօր ֆուտբոլային գործակալ Դմիտրի Սելյուկը կրկին անդրադարձավ քո թեմային: Նա քեզ մեղադրեց ֆուտբոլային անբարոյականության մեջ: Իբրեւ թե դու Հայաստանի հավաքականն ընտրել ես, քանի որ Հայաստանի ֆուտբոլի ֆեդերացիան քեզ բնակարան է նվրել եւ գումար տրամադրել: Իսկ այժմ էլ գնացիր Թուրքիա միայն գումարի համար:
Սելյուկը հիմար է, եթե այդպիսի բան է ասել: Մինչեւ իմ տեղափոխությունը նա երկու օր առաջ զանգահարեց ինձ եւ առաջարկեց համագործակցել իր հետ: Ես ասացի՝ ՈՉ: Ահա այդ պատճառով է նա նման հիմար բաներ խոսում: Եթե ես գումար ընտրեի, ես կընտրեի Հոլանդիայի ազգային հավաքականը, քանի որ բոլորը գիտեն, որ ֆուտբոլիստի արժեքն այնտեղ շատ բարձր է՝ համեմատած Հայաստանի: Ես ընտրեցի Հայաստանը սրտովս, այլ ոչ թե գումարի համար: Եթե ընտրեի գումարը, եւս 2,5 տարի կմնայի «Սպարտակում»: Սելյուկը հիմար մարդ է, ով անգամ արժանի չէ, որպեսզի արձագանքենք նրան: Նա ֆուտբոլիստների պայմանագրում ավելացնում է հավելյալ 5 միլիոն, եթե նրանք չպահեն պայմանները, այն դեպքում, երբ ֆուտբոլիստներ վաստակում են 15 000: Հիմա ասեք, ո՞վ է մտածում ավելի շատ գումարի մասին:
Արաս, հիշո՞ւմ ես այն աղմկահարույց հարցազրուցը, որ դու տվեցիր, թե իբրեւ քեզ չէն խաղացնում «Սպարտակում», քանի որ այն ժամանակվա գլխավոր մարզիչ Մուրատ Յակինը թուրք էր, իսկ դու հայ: Այժմ դու տեղափոխվում ես Թուրքիա:
Ես ուզում եմ ասել, որ ես ֆուտբոլիստ եմ ու ուզում եմ զբաղվել միայն ֆուտբոլով, այլ բաներ ինձ չեն հետաքրքրում, հատկապես խոսել անցյալից:
Վերա Մարտիրոսյան / Vera&Football