Հայաստանի տնտեսությունը արմատական բարեփոխման կարիք ունի: Անհրաժեշտ է ակտիվորեն աշխատել արտահանման ծավալների ավելացման ուղղությամբ, ավելի արդյունավետորեն օգտագործել առանց այն էլ փոքր ռեսուրսները: Այդ մասին փետրվարի 2-ին լրագրողների հետ հանդիպմանը հայտնել է Հայաստանի Հայրենական ապրանք արտադրողների միության ղեկավար Վազգեն Սաֆարյանը:
Նրա խոսքով, այն, որ «Տնտեսական ազատության ինդեքսում» Հայաստանը 54-րդ տեղն է զբաղեցրել, պետք է զգաստացնի: Ինքնահանգստացման ոչ մի պատճառ չկա: «Մեր երկրի վարկանիշի նվազմանը հանգեցնող հանգամանքները բխում են տնտեսական կյանքի իրավական ապահովման պակասից, կոռուպցիայի ընդգրկումից», - նշել է Սաֆարյանը: Փորձագետը ելքը տեսնում է համալիր ներդրումային ծրագրի մշակման եւ իրականացման մեջ:
Հիշեցնենք, որ ամերիկյան «Heritage Foundation» հիմնադրամը հրապարակել է հերթական տարեկան «Տնտեսական ազատության ինդեքսը», որի համաձայն, Հայաստանի տնտեսությունը բնութագրվում է որպես չափավոր ազատ: Հայաստանը մի տարում 52-րդ տեղից իջել է 54-րդ տեղ: