Թեքսասյան DeLorean Motor Company ընկերությունը մտադիր է վերականգնել այն մեքենայի թողարկումը, որով «Վերադարձ դեպի ապագա» ֆիլմի հերոսները ճամփորդում էին ժամանակի մեջ: Ռոբերտ Զեմեկիսի «Հետ դեպի ապագա» (Back to the Future) եռագրությունը, որի առաջին մասը թողարկվել էր 1985-ին, պատմում է Մարտի Մաքֆլայ անունով երիտասարդ տղայի (Մայքլ Ջ. Ֆոքս) եւ արտառոց գիտնական Դոկի (Քրիստոֆեր Լլոյդ) արկածների մասին, վերջինս կարողացել է «Դելորիան» ժամանակի մեքենա ստեղծել եւ ուղեւորվել դեպի անցյալ: DeLorean DMC-12-ը, որն իրոք ֆուտուրիստական տեսք ունի, արտադրությունից հանվել է 35 տարի առաջ: Սակայն դաշնային իշխանություններն ընկերությանն այդ մեքենայի սահմանափակ արտադրության թույլտվություն են տվել: DeLorean-ի կառավարիչ Սթիվեն Ուիննի խոսքով, նախատեսված է ընդամենը 300 մեքենա արտադրել, տեղեկացնում է ՏԱՍՍ-ը:
Ակնկալվում է, որ DeLorean-ի առաջին նմուշները կհայտնվեն արդեն եկող տարի: Ինչպես վստահեցնում են ավտոընկերությունները, «ժամանակի մեքենայի» գինը կկազմի 100 հազար դոլարից պակաս: Նախատեսված է նաեւ այդ ապրանքանիշի օգտագործված մեքենաներ վաճառել գործարանային պայմաններում դրանք իդեալական վիճակի բերելուց հետո: Նման մեքենաների արժեքը 45-ից 55 հազար դոլար կկազմի:
