Լիտվան շահագրգիռ է Երեւանի հետ համագործակցության շրջանակների ընդլայնման հարցում: Այս մասին, այսօր՝ փետրվարի 2-ին, Երեւանի քաղաքապետ Տարոն Մարգարյանի հետ հանդիպման ժամանակ նշել է ՀՀ-ում Լիտվայի արտակարգ եւ լիազոր դեսպան Էրիկաս Պետրիկասը:
Քաղաքապետարանից NEWS.am-ին հայտնում են, որ ողջունելով հյուրին եւ ընդգծելով երկու ժողովուրդների միջեւ առկա բարեկամական հարաբերությունները՝ քաղաքապետը կարեւորել է լիտվական քաղաքների եւ, մասնավորապես, մայրաքաղաք Վիլնյուսի հետ համագործակցության ընդլայնման հնարավորությունները:
Շնորհակալություն հայտնելով քաղաքապետին ջերմ ընդունելության եւ համագործակցության պատրաստակամության համար՝ Էրիկաս Պետրիկասը նշել է, որ լիտվական կողմը եւս շահագրգիռ է Երեւանի հետ համագործակցության շրջանակների ընդլայնման հարցում եւ վստահեցրել է, որ իր լիազորությունների շրջանակում կանի հնարավորը երկուստեք հարաբերությունները գործնական դաշտ տեղափոխելու ուղղությամբ:
Հատկանշելով, որ Լիտվայի Հանրապետությունը առաջինն է ճանաչել Հայաստանի Հանրապետության անկախությունը` 1991թ.-ին եւ նկատելով, որ այս տարի լրանում է այդ իրադարձության 25-ամյակը, դեսպանը Երեւանի քաղաքապետին առաջարկել է Լիտվայում արդեն ավանդական դարձած «Փողոցային երաժիշտների օր» փառատոնն անցկացնել նաեւ Երեւանում:
Ողջունելով փառատոնի անցկացման գաղափարը` Տարոն Մարգարյանը նշել է, որ քաղաքապետարանն իր լիազորությունների շրջանակում պատրաստ է աջակցելու Երեւանում փառատոնի կազմակերպմանն ու անցկացմանը:
