Ուռուցքաբանության ազգային կենտրոնում անցած տարվա մարտի 12-ին մահացած 61-ամյա Սվետլանա Պետրոսյանի գործով նշանակվել է կրկնակի դատաբժշկական փորձաքննություն: Այս մասին NEWS.am-ի թղթակցին ասաց գործով տուժողի իրավահաջորդի ներկայացուցիչ Արայիկ Պապիկյանը:
«Դատաբժշկական հանձնաժողովային փորձաքննության համաձայն՝ բժշկական սխալ չի եղել, մենք համաձայն չենք եւ միջնորդել էինք կրկնակի փորձաքննություն նշանակել: Այն բավարարվել է»,- ասաց Արայիկ Պապիկյանը:
Ավելի վաղ հաղորդել էինք, որ 61-ամյա Սվետլանա Պետրոսյանի մոտ 2015թ. հունվարի 12-ին հայտնաբերվել է կրծքագեղձի քաղցկեղ: Ուռուցքաբանության ազգային կենտրոնում կինը մարտի 2-ին քիմիաթերապիա է ընդունել: Մահացածի որդին պնդում է, որ մայրն առանց լյարդի պատշաճ հետազոտության է ենթարկվել քիմիաթերապիայի, որի հետեւանքով լյարդային անբավարարության պատճառով 10 օր անց՝ մարտի 12-ին անց մահացել է:
Դեպքի առթիվ հարուցվել է քրեական գործ Քրեական օրենսգրքի 130-րդ հոդվածի հատկանիշներով, այն է՝ բժշկական օգնություն եւ սպասարկում իրականացնողների կողմից մասնագիտական պարտականությունները չկատարելուն կամ ոչ պատշաճ կատարելուն: