Լոռու մարզի Կաթնառատ գյուղում 63-ամյա Վիլսոն Խանաղյանը ու նրա որդին՝ 40-ամյա Հովհաննեսը, ընտանիքով հարձակվել են իրենց հարեւանությամբ ապրող Սարգսյանների ընտանիքի վրա: NEWS.am-ի հետ զրույցում այս մասին ասաց Կաթնառատի գյուղապետի տեղակալ Կարեն Մովսիսյանը:
Կարեն Մովսիսյանը նշեց, որ հարեւանները իրեն պատմել են, որ սա առաջին դեպքը չէ, երբ Վիլսոն եւ Հովհաննես Խանաղյանները տարբեր պատճառաբանություններով հարձակվում են իրենց համագյուղացիների վրա, Մովսիսյանի խոսքով, հարեւանները, ում վրա որ հարձակվել են Խանաղյանները, ոստիկանությունում ասել են, որ նրանք հոգեկան շեղումներ ունեն:
«Ասումե ն, որ էդ մարդկանց հոգեկանները մի քիչ խանգարված է, դրանց աչքին թվում է, թե իրենց բակից խոտ են գողանում կամ էլ իրենց անվան հետ են խաղում ու հարձակվում են մարդկանց վրա: Բայց ես բացառում եմ, որ ում վրա որ հարձակվել են, ընդունակ են նման քայլի, Սարգսյանների ընտանիքը հենց իրենց կողքն է ապրում, շատ լավ մարդիկ են»,-ասաց գյուղապետի տեղակալը:
Կարեն Մովսիսյանի խոսքով, 1 ամիս առաջ էլ Խանաղյանները եղանով հարձակվել են 80-ամյա Նիկոլ Պողոսյանի վրա եւ նրան մարմնական վնասվածքներ պատճառել: Գործը հասել է ոստիկանություն, սակայն վերջին պահին վկաները հրաժարվել են ցուցմունք տալուց եւ վկաներ չլինելու հիմնավորմամբ գործը փակվել է: Պողոսյանները ոստիկանությունում դիմում են գրել եւ ասել, որ Խանաղյանները խոտի գողության պատճառաբանությամբ են հարձակվել իրենց վրա:
«Վկաները իրենցից վախեցել են, շատ ագրեսիվ են, ոստիկանությունում հրաժարվել են ցուցմունք տալուց եւ էդպես գործը փակվել է»,– ասաց գյուղապետի տեղակալը:
