Տուլայում 2015թ. նոյեմբերի 3-ին վթարված հայկական ավտոբուսը, նախնական տեղեկություններով, չի համապատասխանել չափանիշներին: Այս մասին NEWS.am-ի թղթակցի հետ զրույցում ասաց ողբերգական վթարի մեղադրյալ, վարորդ Գառնիկ Հարությունյանի փաստաբան Ռուբեն Կիրակոսյանը:

«Նախաքննությունն ընթանում է, դեռեւս մի քանի ամսվա աշխատանք կա կատարելու, քանի որ գործով 60 տուժող կա, նշանակվել են փորձաքննություններ: Դրանց մի մասը, որոնք վերաբերում են տուժողների ստացած մարմնական վնասվածքներին, արդեն ստացել ենք: Ամենակարեւորը, մենք տեղեկություն ունենք, որ վթարված ավտոբուսն էլ է ուսումնասիրվել, սրա վերաբերյալ այլ փորձաքննություններ էլ են նշանակվել, որոնց եզրակացությունը դեռ չկա: Սակայն մենք տեղեկություն ունենք, որ այս ավտոբուսը ստանդարտներին չէր եւ ժամանակին արտադրվել է մի քանի օրինակով միայն: Այդ պատճառով կարծում ենք, որ հենց սա է եղել վթարի պատճառը»,- ասաց Ռուբեն Կիրակոսյանը:

Նշենք, որ ավտոբուսը պատկանում էր «Քինգ Դելյուքս»-ին: Ի սկզբանե վարկածներ էին շրջանառվում, որ վարորդը կամ արագությունն է գերազանցել, կամ բջջային հեռախոսով է խոսել. «Նախաքննական գաղտնիք կա, սակայն իմ պաշտպանյալն արագությունը չի գերազանցել, անզգույշ չի եղել: Ինչ վերաբերում է բջջային հեռախոսով խոսելուն, մենք հակառակ ապացույցն ունենք»:

Փաստաբանը մի քանի անգամ տեսակցել է կալանավորված վարորդին. նրան արդեն  թարգմանիչ է տրամադրվել:

«Հոգեպես ամուր մարդ է, սակայն նեղսրտում է, որովհետեւ տարեց ծնողներ ունի, որդին ծառայում է Արցախում, եւ միայն ինքն էր աշխատում եւ պահում ընտանիքը»,- ասաց Ռուբեն Կիրակոսյանը:

Հիշեցնենք, որ Տուլայի մարզում ողբերգական վթարը տեղի էր ունեցել 2015թ. նոյեմբերի 3-ին: Վթարից զոհվել է 9 մարդ։ Վթարի առնչությամբ հարուցվել է քրեական գործ «ճանապարհային երթեւեկության կանոնները եւ փոխադրամիջոցի շահագործման կանոնները խախտելու» հոդվածով։ Ավտոբուսի վարորդ Գառնիկ Հարությունյանը կալանավորված է։