Վերակառուցման եւ զարգացման միջազգային բանկը եւս 40 մլն ԱՄՆ դոլարի վարկ կտարամադրի Հայաստանին՝ շուրջ 190 կմ ավտոճանապարհի կառուցման համար: Այս մասին այսօր՝ փետրվարի 3-ին, ԱԺ-ում հայտարարեց Տրանսպորտի եւ կապի նախարարի առաջին տեղակալ Արթուր Առաքելյանը, որը «Հայաստանի Հանրապետության եւ Վերակառուցման եւ զարգացման միջազգային բանկը միջեւ 2015 թվականի օգոստոսի 26-ին ստորագրված «Կենսական նշանակության ճանապարհային ցանցի բարելավման ծրագրի համար լրացուցիչ ֆինանսավորում» վարկային համաձայնագիրը վավերացնելու մասին հարցի հիմնական զեկուցողն է:
Վարկային այս ծրագիրը շարունակական բնույթ է կրում եւ ուղղված է մարզերի համայնքային ճանապարհային ցանցի զարգացմանը: Ըստ Արթուր Առաքելյանի՝ առաջինը տրվել է 2013թ-ին, սա էլ երկրորդ վարկն է:
«Վարկային արժեքն է 40 մլն ԱՄՆ դոլար, որը նախատեսվում է սպառել 2016-2019թթ. ընթացքում եւ արդյունքում վերակառուցել 190 կմ ճանապարհ: Վարկն արտոնյալ է իր բնույթով, մարման ժամկետը 25 տարի է, տոկոսադրույքը լողացող է»,- ասաց Արթուր Առաքելյանը: