Երեւանի «Շտապօգնության» կենտրոնական ենթակայանում փետրվարի 2-ին տեղի ունեցած միջադեպից տուժած բուժակ Վաղարշակ Սահակյանը չարացած չէ հոգեկան խնդիրներ ունեցող Արզումանի վրա, որի պատճառով կոտրել է ոտքը: NEWS.am-ի հետ զրույցում բուժակը պատմեց, որ անօթեւան Արզումանն ունի խրոնիկ հոգեկան հիվանդություն, իրենք նրա հետ բազմիցս առնչվել են:
«Մի քանի անգամ տեղափոխել ենք հիվանդանոց, ուղղակի այս անգամ այսպես ստացվեց, խմած էր»,- ասաց Վաղարշակ Սահակյանը:
53-ամյա Վաղարշակ Սահակյանը պատմեց, որ դեպքը պատահել է գիշերը ժամը 2-ի սահմանում, երբ նոր էին վերադարձել կանչից: «Սենյակում էինք, մեկ էլ աղմուկ լսեցի, դուրս եկա, տեսա` ինչ-որ մի անձնավորություն մեր բժիշկներից մեկին շնչահեղձ է անում, կռվում են իրար հետ: Ինձ ուրիշ բան չմնաց, քան մեր ընկերոջն ազատեմ այդ անձնավորության ճիրաններից: Ես բռնեցի այդ անձնավորությանը, ու իմ վրա քաշելոմ միասին ընկանք գետնին, ոտքս կոտրվեց»,- պատմեց նա:
Նշենք, որ Վաղարշակ Սահակյանը վիրահատվել է:
Նշենք, որ առողջապահության նախարարությունը հայտարարություն էր տարածել, որ Վաղարշակ Սահակյանի բուժօգնությունը, նախարարի հանձնարարությամբ կկազմակերպվի պետական պատվերի շրջանակում:
Արզումանը բերման է ենթարկվել: Նշանակվել է դատաբժշկական փորձաքննություն:
