Հայաստանի եւ «Գազպրոմի» միջեւ պայմանագրում Իրանից գազ գնելու արգելք չկա։ Այս մասին փետրվարի 3-ին՝ խորհրդարանում կառավարական ժամի ընթացքում, ասել է փոխվարչապետ Վաչե Գաբրիելյանը՝ պատասխանելով ՀԱԿ խմբակցության ղեկավար Լեւոն Զուրաբյանի հարցին։
Նրա խոսքով՝ Հայաստանը ոչ մի երկրի գազի մատակարարման մենաշնորհ չի տվել։ Գազի գնի հարցերը ամենօրյա հոգսերի թվում են, իսկ հունվարի կեսից վարչապետը հանդիպել է բիզնես ներկայացուցիչների հետ։
«Մենք գազ մատակարարողներից, այդ թվում՝ Իրանից գազ գնելու վրա սահմանափակումներ չունենք։ Թեհրանի հետ քննարկումներ են ընթանում, բայց կան շուկայական եւ այլ գործոններ, որոնց մասին արդեն հիշատակել է էներգետիկայի նախարարը»,- հավելել է Գաբրիելյանը։
Հիշեցնենք, որ 2013թ. դեկտեմբերին Հայաստանը եւ Ռուսաստանը համաձայնության էին եկել սահմանին գազի գնի հարցում՝ սահմանելով այն հազար խ/մ-ի դիմաց 189 դոլար։
Նշենք, որ Էներգետիկայի նախարար Երվանդ Զախարյանը բազմիցս հայտարարել է, թե Իրանը պաշտոնապես ավելի էժան գնով գազ չի առաջարկել։