Toyota Motor Credit Corporation-ը 21.9 մլն դոլար փոխհատուցում կվճարի աֆրոամերիկացիներին, ասիացիներին եւ խաղաղօվկիանոսյան կղզիների բնակիչներին։
Ընկերությանը մեղադրում են ռասայական խտրականության մեջ. ազգային փոքրամասնությունների ներկայացուցիչները ավելի շատ վարկեր են վճարել, քան սպիտակամորթ ամերիկացիները՝ անկախ վարկը մարելու կարողությունից։ Միջինում աֆրոամերիկացիները 200 դոլար ավելի են վճարել, ասիացիները եւ կղզիաբնակները՝ 100 դոլար։
Համաձայն ԱՄՆ սպառողների շահերի պաշտպանության գրասենյակի հայտարարության՝ նման քաղաքականության զոհ է դարձել մի քանի հազար մարդ։
Հաղորդվում է, որ ընկերությունը անգիտակցաբար է նման քաղաքականություն վարել։ Toyota Motor Credit-ը մեքենա գնողների անմիջական վարկատուն չէ։ Ընկերությունն աշխատում է մատակարարների հետ, որոնք եւ նշանակում են վարկի տոկոսադրույքը։ Toyota-ի դեպքում մատակարարները կարող էին դրույքը մեծացնել 2.5 տոկոսով։ Ընկերությունը չէր կարող վերահսկել գնորդների ազգային պատկանելիությունը, փոխանցում է BBC-ի ռուսական ծառայությունը։