Հայաստանի կառավարությունն ուսումնասիրում է հանրապետությունում բենզինի ներկա գների հիմնավորվածությունը: Այս մասին փետրվարի 3-ին խորհրդարանում կառավարական ժամի ընթացքում հայտնել է փոխվարչապետ, միջազգային տնտեսական ինտեգրման ու բարեփոխումների նախարար Վաչե Գաբրիելյանը՝ պատասխանելով «Հայ ազգային կոնգրես» խմբակցության ղեկավար Լեւոն Զուրաբյանի հարցին:
Փոխվարչապետի խոսքով, նախարարների կաբինետն արդեն դիմել է տնտեսական մրցակցության պաշտպանության պետական հանձնաժողովին: «Մի շարք փաստեր կարելի է բացատրել տրանսպորտային ծախսերով ու նաեւ մատակարարումների ընտրության հնարավորություններով: Այդուհանդերձ Կառավարությունն արդեն խնդիր է դրել՝ մանրակրկիտ ուսումնասիրել այս հարցը»,- հավելել է Գաբրիելյանը:
Հունվարի 14-ին վերոնշյալ պետհանձնաժողովի ղեկավար Արտակ Շաբոյանը հայտնել էր, որ 2015 թ. ընթացքում Հայաստանում բենզինը 13 տոկոսով էժանացել է: Այդուհանդերձ, անցած տարվա ընթացքում նավթը շարունակում էր ավելի արագ էժանանալ ( 2015 թ. հունվարին այն արդեն բարելի դիմաց 50 դոլար արժեր, իսկ հիմա՝ 33 դոլար արժե): Ռուսական նավթամթերքները արտահանման մաքսատուրքից ազատելուց հետո Հայաստանը գրեթե ամբողջովին անցել է ռուսակամ բենզինին, որի ինքնարժեքի զգալի մասն են կազմում հարկերը (իսկ Հայաստանի դեպքում դրանց գումարվում են նաեւ տրանսպորտային ծախսերը): Դրանով են պետական պաշտոնյաները բացատրում նավթի ու բենզինի գների թույլ փոխադարձ կապը: