ՀՀ կառավարությունը մեկ ամսվա ընթացքում կավարտի «Նաիրիտ» գործարանի ունեցվածքի եւ բաժնեմասերի վերահսկիչ փաթեթի իրավունքները ստանալու գործընթացը։ Այս մասին փետրվարի 3-ին՝ խորհրդարանում կառավարական ժամի ընթացքում, ասել է էներգետիկայի նախարար Երվանդ Զախարյանը՝ պատասխանելով ՀՅԴ խմբակցության պատգամավոր Արծվիկ Մինասյանի հարցին։
Նախարարի խոսքով՝ գործարանի բաժնեմասերի 90 տոկոսը դե ֆակտո փոխանցվել են Կառավարությանը։ «Ինչ վերաբերում է գործարանը նորից գործարկելուն, ապա բանակցություններ են տարվել մի քանի ընկերությունների հետ, սակայն այս պահին կոնկրետ համաձայնություն ձեռք չի բերվել։ Կառավարությունը շահագրգռված է գործարանի վերականգման գործում այնպես, ինչպես մենք։ Այլ հարցեր այդ կապակցությամբ օրակարգում չկան»,- նշել է նախարարը։
