ՀՀ կառավարությունը դեռեւս ոչինչ չի կարող ասել գազի գնի վերանայման հարցով Ռուսաստանի հետ բանակցությունների մասին։ Այս մասին փետրվարի 3-ին խորհրդարանում ասել է ՀՀ էներգետիկայի եւ բնական պաշարների նախարար Երվանդ Զախարյանը։
«ՀՀ վարչապետը անհրաժեշտ է համարել դիմել ռուսական կողմին այդ հարցով։ Քննարկումները շարունակվում են, սակայն չեն պտտվում կոնկրետ թվի շուրջ, իսկ ընթացիկ բանակցությունների մասին մանրամասներ հայտնել դեռեւս հնարավոր չէ»,- ասել է նախարարը։
Հիշեցնենք, որ 2013թ. դեկտեմբերին Հայաստանը եւ Ռուսաստանը համաձայնության էին եկել սահմանին գազի գնի հարցում՝ սահմանելով այն հազար խ/մ-ի դիմաց 189 դոլար։
Նշենք, որ Էներգետիկայի նախարար Երվանդ Զախարյանը բազմիցս հայտարարել է, թե Իրանը պաշտոնապես ավելի էժան գնով գազ չի առաջարկել։
