Երեւանում տարեսկզբին շենքի 8-րդ հարկից ընկած եւ ողջ մնացած 24-ամյա Անի Հայրապետյանը ողնաշարի վիրահատության կենթարկվի Ռուսաստանի Դաշնությունում: Այս մասին NEWS.am-ին հայտնեցին Երեւանի «Հերացի» թիվ 1 հիվանդանոցային համալիրից:
Անի Հայրապետյանը ՌԴ քաղաքացի է, եւ այնտեղ է տեղափոխվել ծնողների ցանկությամբ: Հայաստանից ՌԴ Անի Հայրապետյանի տեղափոխումը կազմակերպել է ՀՀ-ում ՌԴ դեսպանատունը:
Ծանր վիճակում` բազմակի կոտրվածքներով, ոսկրաբեկորներով վնասված ողնուղեղով հոսպիտալացված Անի Հայրապետյանը գործիքային և լաբորատոր հետազոտություններից անմիջապես հետո նյարդավիրաբույժներն վիրահատվել էր: Վիրահատությունից հետո նրա վիճակը կայունացել է, սակայն միայն երկրորդ վիրահատությունից հետո աղջիկը կկարողանա քայլել:
Ավելի վաղ NEWS.am-ը հայտնել էր, որ հունվարի 3-ին՝ ժամը 23:00-ին ՏԿԱԻՆ ահազանգ է ստացվել, որ Երեւանի Վ. Համբարձումյան փողոցի թիվ 47 շենքի բակում ընկած երիտասարդ աղջիկ է հայտնաբերվել: Նախնական տվյալներով՝ 24-ամյա Անի Հայրապետյանը լվացքի պարանների վրա է ընկել, հետո ձնակույտի մեջ, ինչի շնորհիվ ողջ է մնացել: